SA bisan unsa nga ehersisyo, alang nako wa nay makatupong sa sikad sa biseklita kon lingaw ang hisgutan. Asa ka mangita og exercise nga magsuroysuroy ka lang? Naa ka pay daghang mga higala nga mahinagbo.
Wa na usab ko makakita og laing sakyanan nga labing barato, sa pagpalit ug maintenance. Sa mountain bike lang, makapalit ka na ron og brand new nga MTB sa tag P5,000. Ayaw lang pag-expect hinuon nga kini top of the line kay bisan gani P20,000 nga balor sa MTB, ubos-ubos pa na nga klase kon brand new ang hisgutan.
Kon gusto ka lang mag-exercise libot sa siyudad o makadaginot sa pletihan labina kon kaduha o katulo sakyon ang imong trabahoan, haom ang tag P5,000 nga MTB o folding bike nga tag P3,000.
Labing ubos ni og maintenance base sa akong experience. Mag-andam ka lang og bomba para sa hangin sa ligid, tapak para naa kay magamit kon ma-flat ug WD40 alang sa kadena nga mabutangan matag karon ug unya.
Maayo pa ang kondisyon sa imong lawas, makadaginot ka pa sa plete. Mao nay giingon nga bike everyday to keep the doctor away.
Siaw
Nagkadaghan na tuod ang nagbiseklita, apan nagkadaghan sab ang mga badlungon. Kon dunay mga motorsiklo nga mo counterflow, naa sab ang mga biseklita. Kapila na ko makasugat og nagbiseklita nga mo counterflow.
Dihang nagsikad pa ko og sige dinhi sa siyudad, wa mahitabo nga ni-counterflow ko kay akong gilikayan nga makaigo. Apan karon, daghan na ang nagbuhat niini. Naay uban anha mangagi sa sidewalk nga alang unta sa mga pedestrian nga maglakaw.
Naa say uban nga nag road ug mountain bike nga nag-ukopar og usa ka lane tungod kay nag-estorya samtang nagsikad. Okay ra unta na kon luag ang mga karsada. Apan sa atong mga dalan nga gagmay kaayo, di ni maayo. Kana lang ganing taxi ug PUJ nga mokuha og pasahero makabalda na gani sa dagan sa trapiko, unsa na kaha nang mga biseklita nga naa sa tunga sa karsada?
Nahilom
Napasar na Cebu City ang bike lane ordinance sa Sugbo.Apan human ni mapasar, nahilom na ang Siyudad kabahin niini. Duna na gani gitukod nga board, apan hangtod ron wa na koy nadungog.
Wa pa ko kalimot nga niatubang mi sa Cebu City Council aron pagpadayag sa among pagsuporta sa ordinansa. Giduso kini ni kanhi konsehal Nida Cabrera nga wa na masubilii. Maayo unta kon tigumon niya ang mga tawo nga nalambigit sa pag-andam sa ordinansa. Gihagoan ni ug gitun-an.
Lahi ra kon dunay lane ang mga biseklita kay makuhaan ang kakuyaw samtang magtindak. Kay kon naa sa bike lane, priority ang mga nagtindak bisan tuod kon kini shared lane.
Wa na koy balita kabahin usab sa board. Nganong naghisgot ko ini? Kay ang biseklita lagi usa sa mga maayong sulusyon sa trapiko dinhi sa atoang Metro Cebu. Kon ang mga lungsod ug siyudad sa Metro Cebu magpasar ug mag-aktibo sa pagduso niini, makuhakuhaan ang mga sakyanan sa kadalanan.
Ang nakapait lang, kada dunay bag-ong administrasyon, lainlain ang prayoridad. Pait ni nga reyalidad.