Paghilak sa Birhen sa Simala di maoy labing una: shrine founder

DI na bag-o alang sa tagdumala ug volunteers sa Birhen sa Simala ang paghilak sa imahen niini human gii­ngon nga nagmilagro na usab kini sa uwahi nga selebrasyon sa adlawng natawhan niini niadtong Huwebes.

Adlawng Sabado kagahapon ug long weekend alang sa kadaghanang Sugboanon tungod sa mga holiday, dagsa gihapon ang mga deboto sa Birheng Maria bisan pa sa kataas sa linya aron makahawok ug makakita sa imahen niini.

Si Frater Ma. Joseph Magtoto, sa Martin Monks of the Eucharistic Adoration (Evangelizer) kinsa usa sa mga founder sa maong simbahan nakurat dihang gipahibawo ning mantalaan nga trending na usab ang paghilak sa imahen human ang mga deboto mismo ang nakakita sa paghilak niini.

Dugang ni Magtoto nga di na bag-o kanila ang paghilak sa imahen sa Birheng Maria tungod niadtong 1998, labing u­nang paghilak sa imahen nangalimyon ang baho sa buwak sa luha niini.

Base sa kasaysayan sa paghilak sa Birheng Maria lima ka higayon kini nga nihilak niadtong 1998 ug usa niadtong 1999.

Prosesyon

Labing uwahi niadtong Septiyembre 8, birthday niini human sa Grand Procession pasado alas 8:00 sa gabii.

Si Josephine Cordova, 50, usa sa mga volunteer ug rosarian nibutyag sa Superbalita Cebu nga sila mismo mga volunteer nakasaksi na usab sa paghilak niini.

Dugang ni Cordova nga unang higayon nga gihimo ang Grand Procession nga lakip nga niprosesyon ang ubang imahe sa Birheng Maria diin daghan usab ang nitambong niini.

Human sa prosesyon, gibutang kini likod sa sacristy diin gisulod kini og orna ug diha na mihilak.

Nagtuo si Cordova nga nalipay ang imahen sa iyang adlaw nga natawhan diin daghang higayon na usab kini nila nakita nga nagmilagro hilabi na sa panahon sa pilgrim.

Si Delia Chavez, 55, kauban ni Cordova nga volunteer sa simbahan, nagkanayon nga sulod sa walo ka tuig niya nga pagserbisyo sa simbahan sagad sa pangayuon niya sa birhen ihatag niini.

Malipay usab siya sa panahon nga aduna’y mohangyo niya nga iampo sila sa birhen tungod kay mamahimo sila nga instrumento ngadto sa birhen.

Diin gikan?

Usa ka babaye naila nga si Terry Brooks ang nitunol niini sa mga monghe sa panahon nga nibuto ang Mt. Pinatubo.

Gikan sa Pampanga, 1998 dihang gidala sa mga monghe ang imahen sa Lindogon ug didto nagsugod ang karon Sanctuary Castle of Mama Mary sa Marian Hills, Lindogon, Simala, Sibonga.

Apan kon subayon ang pipila ka tuig, usa ka lalake nga naila nga si Ing­ko Niyong Villamor ang nitagna nga mamahimong balaan ang bukirang bahin sa Lindogon.

Daghan ang wala motuo kang Ingko Niyong apan kapin sa 60 ka tuig ang milabay dihang natinuod ang tagna niini.

Karon, tungod sa ka milagroso sa maong imahen sa Birhen Maria, daghan ang donasyon ingon man mga deboto ang nibisita sa simbahan hinungdan nga nahimo na kining kastilyo.

“Dili man sad ta ana kapugos nila kon dili sila motuo, pero naa raman jud na’y pamaagi nga sila mismo makasaksi mao na kuwang sila sa ilang pagtuo,” matod ni Cordova dihang gipangutana sa Superbalita Cebu kon unsa’y komento niini sa mga dili motuo sa pagmilagro sa Birheng Maria.

Si Msgr. Esteban Binghay, Episcopal vicar sa Archdiocese sa Sugbo, niingon nga siya mismo makadaghan na makasaksi sa mga milagro sa Lindogon, apan siya nipahimangno nga di angay magpalabi ang katawhan.

Iyang gihulagway ang gipakita sa Birhen Maria nga sinyales alang sa katawhan nga mag-usab na.