COTABATO CITY -- Hugot karon nga gipanid-an sa militar ug kapulisan ang gidudahan nga private army ni Talitay Vice Mayor Abdulwahab Sabal ug maguwang nga si Talitay Mayor Montasir Sabal.
Si Sabal gidakop sa sakop sa Criminal Investigation and Detection Group-Autonomous Region in Muslim Mindanao (CIDG-Armm) dihang padung na mokanaog sa eroplano sa Awang Airport sa Datu Odin Sinsuat sa Maguindanao alas 12:15 sa udto niadtong Huwebes, September 8.
Apil sa mga gidakop ang asawa ni Sabal nga si Mohanna Mamalo, bodyguard nga si Nasser Maulana, ug drayber nga si Norodin Abas.
Si Sabal ug maguwang, Mayor Montasir Sabal, naapil sa listahan ni Pangulong Rodrigo Duterte sa mga tawo nga nalambigit sa illegal drugs trade sa probinsiya sa Maguindanao.
Ang Pangulo naghingalan nila niadtong Agosto 7 ning tuiga.
Gikanayon ni Maguindanao Provincial Police Office Director Nickson Muksan nga nakuha sud sa sakyanan ni Sabal ang improvised explosive device (IED), duha ka kalibre .45 nga pistola, usa ka M16 Armalite rifle, ug 12 ka pakite nga shabu.
Dunay miguwa nga balita nga si Sabal gilambigit sa pagpamomba sa Roxas Night Market niadtong Septyembre 2 nga mipatay sa 14 ka mga tawo ug miangol sa 74 ka mga inosenteng tawo.
Giingon nga gihimo kini isip panimalos kang Duterte nga naglambigit nila sa illegal drugs trade.
Apan human sila ginganlan ni Duterte, giklaro sa managsuong Sabal nga di tinuod nga nalambigit sila sa negusyo sa ilegal nga druga sanglit pagpangdaut lang kini sa ilang kontra sa politika.
Human sila gilambigit sa druga, miguwa sab ang report nga nagsugo sila og tawo nga mopatay kang Duterte.
Sa pakighinabi sa Bombo Radyo, giingon ni Sabal nga di tinuod ang maong pasangil.
Sa kasamtangan, hugot nga gipanid-an sa mga otoridad ang gidudahan nilang armadong sakop sa managsuong Sabal aron di makahimo og duguong hitabo isip panimalos sa gidangatan sa opisyal. (Edgar Fuerzas)