DUHA ka giingong mga notadong tigpayuhot sa ginadili nga droga ang nasikop sa managlahing operasyon sa Medina Police Station ug Laguindingan Police Station sa Misamis Oriental.
Unang operasyon gimo sa personahe sa Medina Police Station sa pagpangulo ni Police Senior Inspector Jonathan Namata uban sa koordinasyon sa Gingoog Police Station sa pagpangulo ni PC/Insp. Esperedion Biado III.
Nahitabo kini sa Barangay North Poblacion, lungsod sa Medina, Misamis Oriental nga miresulta sa pagkasikop ni Maclesio Taglines Dayadaya Jr., 36, minyo, residente sa Barangay Agay-ayan, dakbayan sa Gingoog.
Anaa kini sa ika number 5 sa listahan sa provincial level.
Ubay ubay ka mga illegal drug paraphernalia ang nakumpiska gikan sa posisyon niini lakip ang tulo ka pakete sa gitouhang shabu.
Samtang sa pagpangulo sab ni Police Chief Inspector Jelesis Teves, hepe sa Laguindingan Police Station, mihimo sab og operasyon nga miresulta sa pagkasikop ni Eleosi Agbalog, hingkod ang edad residente sa Poblacion, Laguindingan, Misamis Oriental, ug anaa sa number 3 drug target list sa probinsya.
Napalitan kini og usa ka pakete sa gitouhang shabu ug nakuhaan sab ug nagkadaiyang illegal drug paraphernalia.
Sa sunod-sunod nga operasyon sa kapolisan giyera batok droga ang Police Regional Office (PRO) nakasakmit og gitouhang shabu nga mobalor og P5 milyon sulod lamang sa duha ka semana.
Matod ni PRO Regional Director Noel Constantino nga dili sila mohunong sa pakigbisog niini tungod kay dako ang kumpiyansa niini nga molampos ang ilang kampanya.
Kahinumduman uwahing nakuhaan og ginadili nga shabu mao ang usa ka kilo mobalor og P5 milyon niadtong Lunes, Setyembre 12, gikan sa suspek nga mao si Jose Booc sa Barangay Tubod, Iligan City.