ANG Metropolitan Cebu Water District (MCWD) mosugod na sa septage management program niini human gipirmahan ang kontrata sa contractor nga Envirokonsult Equipment Services Inc.
Ubos sa kontrata, ang Envirokonsult motukod sa pasilidad sulod sa lote sa MCWD sa Barangay San Miguel, Cordova.
Kini pagabuhaton sulod sa 12 ka buwan gikan sa pagpinirmahay sa kontrata nga walay gasto sa bahin sa MCWD.
Ang kontraktor ang mopadagan sa pasilidad sulod sa lima ka tuig.
Ang Environkonsult mohatag ug mga truck ug ekipo nga aprobado sa Department of Health (DOH) ug well-trained ang mga kawani nga mopahigayon sa desludging sa septic tanks.
Ang Envirokonsult, usa ka Manila-based company, mao usab ang naghatag ug desludging services sa laing mga dakong water utilities.
Ubos sa Clean Water Act of 2004, katungdanan sa local government units ang pagpatukod sa septage management facility.
Apan ang MCWD mitanyag nga motabang sa pagtukod sa pasilidad ug pagpalit ug yuta alang niini.
Ang MCWD bag-o lang mihimo og public hearing sa Barangay San Miguel kalabot niini.
Ang mga konsumidor sa MCWD hinayhinay nga mobayad sa kantidad alang sa desludging ug treatment sa hugaw kay ilakip kini sa water bill.
Mokabat lang sa P2.20 ang ilang bayran sa matag cubic meter sa tubig nga ilang nagamit.
Kasagaran, matag pamilya mobayad ug P50 matag buwan o mokabat sa P3,000 sud sa lima ka tuig.
Ang dili mga konsumidor sa MCWD kausa ra mobayad sa kinatibuk-ang kantidad kon sila magpahabwa sa septic tank.
Ang MCWD mobayad sa contractor og P800 matag cubic meter sa hugaw nga makolekta ug ma-treat.
Human sa lima ka tuig, mahimong paliton sa MCWD ang pasilidad ug mga ekipo u gang water district na usab ang mopadagan niini. Apan, mamahimo usab nga i-renew sa MCWD ang kontrata sa Environkonsult ug sila una ang mopadagan niini sulod sa pipila ka tuig.
Ang MCWD nagplano sa pagtukod ug septage treatment facilities sa tulo ka dapit sa Metro Cebu lakip na ang Cordova diin moserbisyo kini sa mga tawo sa maong lungsod ug sa dakbayan sa Lapu-Lapu City.
Adunay private desludgers sa Metro Cebu apan way pasilidad nga molimpyo sa nahabwang hugaw. Kini nakapaduda kun giunsa nila paglabay ang hugaw. (PR)