GITAN-AW karon sa lokal nga kagamhanan sa dakbayan sa Davao, nga pahamtangan og silot ang mga prank callers gamit ang emergency hotline 911.
Kini subay sa na-obserbahan sa Davao City Disaster Risk Reduction and Management Council (DRRMC) nga nagkadaghan ang prank callers, butang nga plano karon sa lokal nga kagamhanan nga silutan ang mohimo niini.
Si Emmanuel Jaldon, officer-in-charge sa Central 911 ug sa DRRMC, nagsulti nga giplano nila karon ang pagpahamtang og silot sa mga prank callers subay sa ipagula unya ni Davao City Mayor Sara Duterte-Carpio nga ordinansa o di kaha usa la executive order nga masayran kinsa kadtong mga 911 pranksters.
Giingon ni Jaldon nga nakadawat na sila og daghang prank calls nga gilangkuban sa bomb threats sukad niadtong Septyembre 2, Roxas night market blast.
"All calls are not taken for granted. We are really responding to them," sulti ni Jaldon.
Dason sa opisyal nga usahay ang mga prank calls makababag sa ilang mga quick response sa tinuod nga mga emergency calls.
"One of these days we will look into these prank callers and file necessary charges if there is already an existing ordinance (that would penalize them)," pung ni Jaldon.
Samtang sa wala pa ang mga polisiya o ang ordinansa, ila unang i-block ang mga numero sa mga prank callers aron di na sila maka-access sa 911, gawas lamang kung mo-explain ang tag-iya sa numero didto sa ilang buhatan. (With CIO)