HULMIGAS! Bag-o pa gani ta nakadungog sa mga kanta sa Pasko sa radyo ug TV tungod sa pag-abot sa Septyembre nga giingong pagsugod sa labing taas nga Pasko sa tibuok kalibutan (sa Pilipinas, may lain pa?), magsugod na sab ang bulan sa Oktobre. Pagkapaspas sa panahon!
Karong semanaha, tungod sa pagsaulog sa Press Freedom Week 2016 nga sa tibuok nasud o tingali sa tibuok kalibutan, dinhi ra gihimo sa Cebu (o-ha!), mas nidaghan pa ang mga inadlawng kalihukan.
Nindot ang feeling nga makauban ang mga higala nga nagtrabaho sa kakompetensya nga mga media outlet. Ning panahona, among gibutang sa luyo sa hunahuna ang pulong kompetisyon ug gipatigbabaw ang panaghigalaay ug paghugoyhugoy (hinaut way plastikay).
Niadtong Sabado, ang Entertainment Media of Cebu (E-Group) ang nipahigayon sa pagpili sa Mr. & Ms. Press Freedom 2016 nga nadaug sa taga Cebu Daily News nga sila si Rabboni Mark Jay Borbon ug Lesley Cara delos Santos.
Nagpasalamat kami sa mga sponsors (Summit Circle Cebu, Cebu Pacific, Robinsons Specialty Store, JG Summit/Universal Robina Corp., Sun Cellular, Robinsons Supermarkets, OLX Phils., Rodel Silva, Jongz Loquinario, Amano by Dexter Alazas ug Lemuel Rosos.) ug sa mga performers (Nashy Casas sa House of Ella, Jacky Chang, Medyo Maldito ug Disco Remix). Nilampos ang kalihukan tungod sa inyong pagpaluyo. Daghan kaayong salamat!
***
Pagka Dominggo ug Lunes, nagkapundok na sab ang mga kabuhat (kauban sa buhat, o-ha!) sa parada ug sa opening program didto sa USC North Campus Gym ug sa opening party didto sa Robinson’s Galleria Cebu. Sumala sa gipaabot, sadya ug alegre ang mga tapoktapok.
Ugma, himoon ang closing party diin ang mga pundok sa mga gi-assign sa lainlaing beat na sab ang magtigi pagpakita sa mga abilidad. Seguradong sadya ug alegre gihapon kini.
Mahimo kahang magpahigayon og Press Freedom Year aron mas taas ang panahon sa pagtapoktapok? Hahaha!
***
Sugod karong Lunes, Sept. 26, hangtud sa Biyernes, Sept. 30, saulogon sa lungsod sa Oslob ang Heritage Week. Kini gihimo aron masabtan ang kamahinungdanon sa pagpangga ug pag-amping sa mga butang, buluhaton ug mga taras nga gikan pa sa kanhiayng panahon.
Kining maong mga butang ang nagsilbing taytayan niadtong higayon nga sila namugna ug sa panahon karon. Dunay mga butang nga makapanganga nato tungod sa ilang kaanindot, kamabulokon, katalagsa-on, kakuti himoon ug uban pang mga hinungdan.
Sa Oslob, daghang mga butang nga namugna sa panahon pa sa mga Katsila sama sa mga bantayan sa hari (watchtower), simbahan, mga koral ug ang nagbunta-ug nga kwartel nga giingong way susama ug nag-inusara sa tibuok nasud.
Kini sila hinimo sa tinabliyang bato ug pila niini nipakita nag mga senyales nga moyukbo na sa kapintas sa mga kusog sa kinaiyahan ug sa panahon. Tungod niini, gikinahanglan ang pag-ayuda sa mga tawo aron di sila hingpit nga matumpag ug mapapas sa nawong sa kalibutan.
***
Wa lang damha, nakatan-aw ko sa pelikulang Mike & Dave tungod kay kini lang ang naabtan namo nga wa pa nagsugod. Wa koy nabasahan tungod niini mao nga wa koy expectation.
Lingaw ang maong salida di lang sa iyang visuals kon di lakip na usab ang dialogs nga usahay alang lang sa mga mature nga tumatan-aw. Di lang hinoon siya parehas kakusog sa Train To Busan nga tulo na ka semana gisalida. Di na seguro parehas kaniadto kakilig ang mga makisine kang Zac Efron nga usa sa mga bida niini.
***
Ang Oasis of Love – Cebu nagpahigayon karon sa Walk with Jesus Seminar sa Camp Sergio Osmeña sugod gahapon ug hangtod ugma. Ang mga igsoon natong polis ang nangapil.
Sa sunod semana (Sept. 30, Okt. 1 ug 2), ang mga igsoon nato sa Lapulapu City na usab ang moapil sa maong seminar adto sa Marigondon Elem. School.
Sa mga nilampos paghuman, mga pahalipay! Praise the Lord.