PAGPAMALIGYA og e-cigarettes kon vape ngadto sa mga menor de edad ug pagpanigarilyo sa pampublikong lugar idili na unya sa kagamhanan sa dakbayan sa Mandaue.
Kini kung hingpit na unyang ma-amendar ang duha ka ordinansa sa Mandaue kabahin sa pagpanigarilyo sa pampublikong lugar ug pagbaligya ug mga sigarilyo sa mga minor.
Sayo ning semanaha, nipahigayon ug public hearing ang kagamhanan sa dakbayan kalabot sa maong hisgutanan.
Nitambong sa maong kalihukan mao ang mga kapitan sa 27 ka barangay, mga doktor gikan sa City Health ug uban pang sektor.
Sa maong kalihukan, gituki niini ang duha ka ordinansa niadtong 2002 ug 2011 kalabot sa pagpanigarilyo sa pampublikong lugar ug pagbaligya ug sigarilyo sa mga menor nga giingong di hugot ang implementasyon niini.
Sumala pa ni Konsehal Raul Kevin Cabahug, chairman sa committee on health nga makatabang ang striktong implementasyon sa maong ordinasa sa mga adik sa mga sigarilyo ilabi na sa mga hinabako nga menor.
Dugang ni Cabahug nga ang maong mga ordinansa lakip sa goverment code ug ang panglawas sa mga Mandauehanon maoy usa sa iyang mandato isip opisyal sa dakbayan.
Sa hearing, matod ni Konsehal Olin Seno sa committee on laws and ordinances nagkanayon nga gilakip nila ug hisgot ang kabahin sa e-cigarettes kon vape nga mas peligro kon itandi sa yanong sigarilyo.
Buot ni Seno nga hugot na unya ang pagpatuman sa mga silot sama sa multa ug pagkapriso kon masakpang manigarilyo sa pampublikong lugar base sa nalatid sa ordinansa.
“Naa na sa section 6 ang mga penalties didto, naay penalties nga multa lang ug imprisonment, so we should implement this laws kay balaud man gud ni, to avoid our youth from smoking,” matod ni Seno.
Gipadayag usab sa mga representate gikan Department of Health atol sa hearing nga angayang sundon sa Mandaue ang gihimo sa dakbayan sa Davao nga wa gyuy manigarilyo sa pampublikong lugar.
Sugyot sa mga taga DOH nga di lang mga drug user ug pusher lang ang Tokhangon, apan lakip na ang mga adik sa sigarilyo sa tinguha nga mahimong cigarette-smoking free ang Mandaue.