USA ka pamilya ang pulos gipangdala sa balay tambalanan human nabangga ang gisakyan nga motorsiklo niadtong Lunes mga alas 9:00 sa gabii sa lungsod sa Initao, Misamis Oriental.
Pangos ug bun-og sa lain-laing parte sa lawas ang naangkon sa mga biktima nga mao si Bienvinido Patlunag, 45, asawang niining si Adela, 39 ug duha ka mga anak nga sila si Perliantes, 9 ug Larciano, 7, pulos mga residente sa Barangay Canitoan ning siyudad sa Cagayan de Oro.
Nasayran nga paingon ning siyudad ang pamilya dihang kalit lang nga mitabok ang usa ka trisikad hinungdan sa pagsungag niini.
Tungod sa kakusog sa pagkabangga, naligid ang motorsiklo ug nahulog ang mga sakay niini. Ang amahan maoy nagrabehan human giprotektahan ang asawa ug mga anak.
Sa pagsulat ning balita, padayon pang nga giatiman sa Northern Mindanao Medical Center ning siyudad ang mga biktima. (SVB)