1 patay, 1 samdan sa kagubot sa beach resort

DIGOS CITY -- Usa ang gideklarang patay dihang nahidangat sa Davao del Sur Provincial Hospital samtang laing usa ang gitabang sa Southern Philippines Medical Center (SPMC) didto sa siyudad sa Davao human sa kagubot sa Aroma Beach Resort sa Barangay Aplaya, ning siyudad.

Ang insidente nahitabo alas 5:30 sa hapon niadtong Sabado.

Sumala ni Superintendent Querubin Manalang, hepe sa Digos City Police Office, unang biktima nailhan nga mao si Teodoro Gubantes Masombol, 44, minyo, tigbantay sa resort ug molupyo sa lugar.

Suma ni Manalang, si Masombol nahiagom og samad pinusilan sa iyang ilong mao nga gidali pagtabang padung sa dakbayan sa Davao.

Nahitabo kini human kalit nga nagkagubot sa resort ug miresponde si Masombol, apan gipusil siya sa suspek nga nailhang si Renato Pesidas, hamtong, minyo ug tigbaligya og ice drop nga taga Purok 3 sa Barangay Dulangan.

Sa laing bahin, si Pesidas gidunggab-patay sa wa mailhing mga estambay nga nakakita sa kaguliyang.

Nasinati ang brown-out sa lugar dihang nahitabo ang kaguliyang hinungdan nga wa mailhi ang nagdunggab sa uwahi.

Ang kapulisan nga uwahing nahidangat sa lugar igo na lamang pag-rekober sa usa ka basiyo sa bala ug .38 kalibre nga rebolber nga adunay sud nga lima ka buhing bala.

Padayong giimbistigahan sa kapulisan ang nahitabo ilabina nga mao kini ang pinakaunang pagpamusil sa siyudad samtang gipatuman ang election gun ban. (Orlando Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph