12,153 nakapahimulos sa 'Food For Work' program

ANAA na sa 12,153 ka indibidwal ang nakapahimulos sa localized version sa siyudad sa Food For work program nga gitawag og "Bayanihan ni Inday sa Barangay" nga pipila ka bulan nang gipatuman human kini gilusad.

Gibutyag ni Danilo Dayanghirang, consultant on special concerns diin usa sa iyang gitutukan mao ang operasyon sa programa nga pinaagi niini daghang pamilya ang nahatagag alibyo, nalimpyuhan sab ang mga dapit nga daghang basura, baradong kanal, baybayon nga naghitak ang hugaw.

Sumala ni Dayanghirang nga pinaagi sa Food for Work Program buot nilang mausab ang naandang gawi sa kadaghanan nga di na lamang motagad sa ubang suliran sa komunidad.

"Dito kasi na-appreciate natin yung programa ng gobyerno. Aside na you are getting something as payment of your work your helping the city sa cleanliness."

Ilawom sa programa matag tagbalay dunay usa ka partisipante, manglimpyo sila sud sa pipila ka adlaw bugti sa grocery items nga ihatag kanila.

Ang grocery items gilangkuban sa bugas, uban pang basic products nga gikinahanglan sa pamilya.

Isplikar ni Dayanghirang nga aron masigurong di magdoble-doble ang pag-avail sa usa ka tawo, makig-coordinate sila sa barangay alang sa pag-ila sa mga indigents nga pamilya. Human niini, ang City Social Services and Development Office maoy mo-identify kanila, mo-isplikar sa dagan sa programa.

Sagad sa mga lugar nga gitutukan sa paglimpyo mao kadtong flood-prone areas dinhi.

Nasayran sab nga sagad partisipante sa programa mga babaye o inahan nga maoy unang naghuna-huna sa pamilya.

"Siguro sa 10 katao, mga 6-7 yung women," ni Dayanghirang pa.

Ang Food for Work maoy pet project ni Davao City Mayor Sara Duterte diin kini nag-awhag og partisipasyon sa tanan.

Ang programa una nga gilusad Abril 2011 sa Isla Verde isip pilot area, diin mga volunteers nagtinabangay sa paglimpyo sa baybayon buntag ug hapon.

Nauna ng nanawagan si Mayor Duterte og suporta sa programa ug nagkanayon nga di na lamang magpunay og salig sa hinabang gikan sa gobyerno apan gikinahanglan nga motrabaho sila, mosalmot sa mga kalihukan sa komunidad.

Ang siyudad mialokar og P3 milyon nga budget alang sa Food for Work Program aron tutukan ang paglimpyo sa kanal, baybayon ug uban pa subay sa Bio-Diversity Enhancement Program dinhi. (Rhona O. Goc-ong)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph