13 nahilo sa ‘guso’

TRESE ka mga laborer ang gidala sa Southern Philippines Medical Center human giingong nalanag sa ilang gikaon nga guso ug giinom nga tubig sa ilang panihapon niadtong Sabado.

Ang trese ka biktima pulos mga trabahante sa Holcim Philippines nga nahimutang sa Barangay Ilang, siyudad sa Davao.

Ang Bunawan Police Station, pinaagi ni Police Officer 2 Roldan Aquino, nag-ila sa mga biktima nga sila Romeo Trinidad, 43; Sherwin Palad, 24; Samuel Zeta, 20; Joel A. Senin, 33; Daniel M. Sarmiento, 20; Ambert Paulino, 29; Michael Caacbay, 29; Florante Barrientos, 31; Mark Anthony Ubalde Corren, 21; Denver U. Damaso, 30; Frederick Alferez, 36; Melvin Felin, 26; ug Pepe Valena, 21, pulos taga lalawigan sa Bulacan.

Subay sa spot report, nasayran nga alas 10:00 sa gabii, Sabado, mibati og pagpanakit sa tiyan ang mga biktima human sa ilang panihapon. Pipila kanila nisuka.

Mga biktima daling gidala sa Trabmoc paramedics ug mobile 27 sa Bunawan Police Station ngadto sa ospital.

"Base sa atong pagpanubay, ang nagluto sa guso ang ila rang kauban sa project sa Holcim. Dili ni sila taga Davao, mga Tagalog ni sila gikan sa Bulacan," sulti ni Aquino.

Dugang sa imbestigador nga walay angay nga kabalak-an tungod kay di delikado ang migula nga resulta gikan sa doktor.

"Actually, di kaayo to delikado kay minor ra man. According to Dr. Delos Reyes, ang iyang finding is nakulangan lang to sa tubig, unya nasudlan og hangin ang tiyan kay gikan paman sila sa biyahe una sila nanihapon," dugang ni Aquino.

Si Aquino nagsulti nga nakagawas na ang mga pasyente ala 1:00 sa kaadlawon kagahapon, Dominggo.

Matud niya nga mahimong maduot ang tawo nga nagluto sa guso gumikan kay dunay lahi nga bersyon ang resulta sa doktor. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph