13 sundalo patay sa bomba?

PATAY ang giingong 13 ka mga sundalo human gipabuthan og bomba niadtong milabayng adlaw sa Sitio Tubod, Barangay Cawayan, Quezon, Bukidnon.

Ang giingong mga sundalo sakop sa 8th Infantry Batallion (8th IB) sa Philippine Army kinsa gipabuthan og bomba sa mga sakop sa New People's Army-South Central Bukidnon (NPA-SCB) Sub Regional Command.

Sa sulat pamahayag nga gipadala ni Ka Ariel "Inda" Magbanwag kinsa tigpamaba sa NPA-SCB nasuta nga gikan pa ang maong mga sundalo nga nipahigayon og clearing operation sa maong dapit nga bag-o lang sab gisulong sa NPA apan na-monitor sa walhong pundok ang grupo sa mga sundalo.

Ilang gilubngan og usa ka command-detonated explosive ang usa ka bahin sa dalan nga giagian sa mga sundalo ug sakto pag-agi nibuto kini ug miresulta sa pagkaigo sa mokabat walo ka mga sundalo nga hinungdan sa ilang kamatayon ug pagkaangol.

Si Captain Christian Uy kinsa tigpamaba sa 4th Infantry Division niingon nga walay kamatuoran ang maong taho sa mga NPA ug giingong pulos kini tumo-tumo lamang.

Hinoun giingong tinoud nga adunay nahitabo nga enkgwentro sa dapit apan abtik ang mga sundalo sa paglikay sa NPA.

Bisan si Leutenant Norman Tagros, kinsa tigpamaba sa 8th IB mihimakak nga napatyan ang ilang mga sakop.

Niini gipamugos sa NPA nga daw bisan unsaon paghimakak sa mga kampo sa sundalo daw dili malimod ang convoy sa duha ka ambulansya ug duha ka military service vehicle nga nahidangat sa Salawagan sa susamang dapit nga giingong mihakot sa patayng lawas sa mga namatay sa bomba nga mga sundalo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph