16-anyos napusilan sa 38-anyos nga kapuyo

NABABHA ang nawong sa 16-anyos nga babaye human gipusil sa iyang 38-anyos nga negosyanteng kapuyo tungod sa panag-away bahin sa text messages kagahapon sa ala 1:15 sa kaadlawon sa Barangay Luray ll, dakbayan sa Toledo.

Si Jeanette Omayan, 16, taga Barangay Magdugo, dakbayan sa Toledo samdan sa iyang tuong nawong human gipusil sa iyang kapuyo nga si Alvin Gerongco, tag-iya og gasoline station ug taga Sangi, Toledo.

‘Kritikal’ ang kahimtang sa biktima.

Si SPO3 Carmelito Hornales, desk officer sa Toledo Police nga nahinabi sa Sun.Star Superbalita nagkanayon sa wala pa mahitabo ang krimen, ang biktima ug ang kapuyo niini gikan nga nitambong og party sa usa ka resto-bar sa Poblacion Toledo.

Kagahapon sa kaadlawon diin igo na sila nali­ngaw ug nagduka na usab human nakainom, nakahukom sila nga mamauli.

Samtang nagmaniho si Alvin sa iyang sakyanan, gikatahong nakadawat kini’g text messages gikan sa usa ka wala mailang tawo hinungdan nga nagkalalis kini sa iyang kapuyo.

Sa ilang panaglalis ug pag-abot sa nahisgutang lugar, kalit lang silang duha nag-inilugay sa kalibre .45 diin aksidenting nakablitan ang armas naigo ang biktima.

Mao kini hinungdan nga ang negosyanteng suspetsado nidali’g dala sa iyang kapuyo ngadto sa South General Hospital (SGH) sa dakbayan sa Naga.

Ang suspek gidakop kini sa mga sakop sa kapulisan sa dakbayan sa Naga, apan kagahapon sa buntag gi-turn-over sa kapulisan sa dakbayan sa Toledo.

Matud ni Hornales, wala mabutyag kun unsay sulod sa mensahe nga nadawat sa negosyante nga ni-resulta sa ilang panag-away.

Hinuon, ang armas gikatahong dunay lisensiya.

Kagahapon sa alas 2:00 sa hapon ang kabanay sa biktima ingon man sa suspetsado nagkasabot hinungdan nga gibuhian kini aron makaatiman sa pagpa­tambal niini sa ospital.

Sumala ni Hornales, ang biktima bag-uhay palang kining nanganak basi sa ilang nakuhang impormasyon.

Hinuon, ilang paabuton gihapon ang kabanay sa biktima kun mosang-at ba sila og reklamo batok sa maong negosyante.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph