176 na ang na-ospital tungod sa karneng kabayo

TACURONG CITY - Miabot na sa 176 ka tawo ang na-ospital tungod kay mikaon og karne sa kabayo didto sa probinsiya sa Sultan Kudarat.

Silang tanan kauban sa lima ka tawo nga namatay sa Sitio Parreno, Barangay Tinalon, Senador Ninoy Aquino human mikaon sa karne sa lima ka kabayo nga ilang gitiwasan human nahilo sa kemikal nga gi-spray sa basakan.

Apan sa gihimo nga imbestigasyon sa Integrated Provincial Health Office sa Sultan Kudarat, migawas nga dili karne ang hinungdan sa kamatayon ug pagka-ospital sa mga biktima.

Migawas nga sakit nga tuberculusis (TB) ang usa sa mga hinungdan sa kamatayon sa lima ka tawo nga mitakod sa ilang mga silingan.

Apil na niiini ang diarhea ug malaria nga wala dayon matambalan ug napasagdan lamang gumikan kasagaran sa mga namuyo sa maong dapit mga lumad. Apan ang ubang mga molupyo sa maong dapit dili motuo sa resulta sa pagsusi sa IPHO-Sultan Kudarat sanglit ilang gituohan nila nga karne gyud sa kabayo ang hinungdan sa kamatayon ug pagka-ospital sa mga biktima.

Hinuon, dunay dugang mga doktor gikan sa DOH-12 ang gipadala sa maong dapit aron palawman pa ang ilang pag-imbestiga sa tinuod nga hinungdan sa kamatayon ug pagka-ospital sa mga biktima. (Edgar Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph