2 ka batan-on, gipamusil

DUHA ka mga batan-on gipamusil sa managlahing dapit sa dakbayan sa Sugbo kagahapon.

Una, usa ka batan-on nga gikan namilar sa haya sa patay ang gipareglahan ug gipusil ug laing kauban ang nakulatahan sa Sityo Manggahan sa Barangay Punta Prinsesa, pasado alas 2:00 sa milabayng kaadlawon.

Ang napusilan mao si Leonardo Alberasten, 25, estambay ug ang nakulatahan mao si Wenelio Tabares, 38, ug usa ka aircon technician.

Gitumbok nga kapin sa 10 ka mga batan-on maoy niparegla sa mga biktima.

Sa pasiunang imbestigasyon nga gihimo sa kapulisan, nga namilar ang mga biktima sa namatay nilang silingan nga si “Inocencia”, nakadisidir si Tabares nga mouli sa ilang panimalay, apan pag-abot sa ilang panimalay, sirado ang gate ug wa kini makasulod hinungdan nakadisidir nga mobalik sa gibilaran aron adto magpalabay sa oras.

Samtang naglakaw, iyang nalabyan ang mga batan-on nga nag-inom daplin sa dalan. Wa magdugay, niduol ang mga batan-on ug dayong gitabangan og kulata ug gibunalan og botilya ang ulo.

Nakabantay niini si Alberasten, giduol ang mga batan-on apan wa kini makabantay nga may dala nga armas ang usa sa batan-on ug dayong gipusil si Albarasten sa iyang seko ug gikulata.

Sa dihang natumba na ang mga biktima gibiya-an sa mga suspek ug gidala sila sa mga silingan sa tambalanan.

Sa laing bahin, talandugon ang kahimtang sa usa ka batan-on human gipusil sa iyang gikasakay sa motorsiklo sa dalan B. Aranas, Barangay Duljo, pasado alas 6:00 kagahapon sa buntag.

Ang biktima nailhan lang sa pangalan nga “Rico,” 16, ug nagpailang taga Junquera, Barangay Kamagayan.

Sa taho nga nasayran gikan kang SPO1 Victor Ayuman sa Homicide Section nagbutyag nga sakay sa motorsiklo ang biktima uban sa duha ka mga suspek ug ang biktima nataliwad-an sa duha.

Pag-abot sa B. Aranas, nihunong ang motorsiklo ug nikanaug ang biktima uban sa nagmaniho sa motorsiklo ug gibiyaan sa motorsiklo ang back-rider nga diha luyo sa biktima.

Samtang naglakaw sila paingon sa pension house, ang nagmaniho sa motorsiklo nga kauban sa biktima sa pagkanaug ug paglakaw, kalit mibunot og armas ug gipusil ang liog sa biktima gamit ang kalibre 45.

Sa dihang naigo na ang biktima, ang suspek daling nidagan balik sa motorsiklo ug dayong sibat palayo sa lugar.

Matud ni Ayuman, planado sa mga suspek ang krimen nga ilang gihimo, subay sa sirkumstansya nga ilang nakita, ila pa usab nga sutaon kon unsay tuyo sa biktima ug mga suspek sa pension house.

Gisubay karon kon gikan ba sa Kamagayan ang biktima ug suspek sa wa pa maabot sa dapit o drugas ba ang motibo sa pagpamusil.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph