2 ka `hitman’ nadakpan

DUHA ka gidudahang mga hitman nasikop sa managlahing mga operasyon sa Cebu City Police Office dinhi sa dakbayan sa Sugbo ug usa ka lungsod sa habagatang Sugbo.

Ang usa sa mga suspek maoy gitumbok nga hitman sa Bloods gang nga giingong responsable sa sunodsunod nga mga drive-by shooting sayo ning buwana.

Samtang ang laing suspek gitumbok nga maoy nipusil patay sa duha ka mga asset sa kapulisan sa managlahing mga higayon.

Ang pagkasikop sa duha gikalipay og maayo ni Mayor Michael Rama.

Si Rhene Aligato Baclaan, 22, alias Insek, kanhi sakop sa Bloods gang, taga Barangay Quiot, dakbayan sa Sugbo, nakuhaag kalibre 45, uban sa walo ka mga bala diha sa magazine, laing pito ka mga kabhang sa bala ug duha ka mga buhing bala dihang siya nasikop sa City Intelligence branch (CIB) sa CCPO sa lungsud sa habagatang Sugbo.

Nakuhaan usab siyag og usa ka bonnet.

SUSPEK

Siya ang gitumbok nga nalambigit sa mga drive-by shooting sa Banawa niadtong Pebrero 12, 2012 diin duha ka sakop sa karibal nga Crips gang ang naigo.

Siya sab ang suspek sa drive-by shooting sa Kinasang-an niadtong Pebrero 15 diin tulo sab ka mga sakop sa Crips ang nabiktima ingon man niadtong Nobembre 2011, diin usa ka Crips ang napusilan, apan ang iyang duha ka mga kauban nadakpan sa Pardo Police Station.

Suspek usab siya sa pagpamusil niadtong Disyembre 2011 sa Kinasang-an, diin usa ka Crips member ang biktima ingon man niadtong Pebrero 11, 2012 diin taxi driver ang iyang gipusil sa may South Road Properties (SRP) sa Barangay Bulacao, dakbayan sa Sugbo.

Si Chief Insp. Romeo Santander, hepe sa CIB nga nahinabi sa Sun.Star Superbalita, nagkanayon nga positibong giila ug gitudlo si Baclaan sa mga testigos nga maoy responsabli sa mga drive-by shooting sa dakbayan sa Sugbo.

Gani dunay duha nga ningpatim-aw sa CCPO kagahapon diin siya positibong giiila, lakip na sa usa ka amahan sa usa sa mga biktima.

Siyay gitudlo nga kauban sa laing tulo ka mga tawo nga nagsakay sa kolor gray nga sedan dihang gipamusil ang biktima.

Si Santander nipadayag nga nihimo na sila og lakang aron masikop ang mga kauban niini nga mga gawasnon pa.

Gipanghinaot ni Santander nga sa pagkasikop kang Baclaan mahunong na ang mga drive-by shooting dinh isa dakbayan.

MIHIMAKAK

Si Baclaan, sa iyang bahin, hugtnong nanghimakak sa mga kremin, apan iyang giangkon nga involve siya sa ubang drive-by shooting sa miaging tuig.

Giklaro niya nga di na siya sakop sa Bloods gang kay nibiya na siya niini.

Matod niya nga nanimawos lang siya human siya gipusil sa karibal nga gang nga Crips hinungdan nga nahimo niya ang krimen.

Ang bala sa armas dihang siya nabiktima sa pagpamusil kaniadto nagpabilin pa sa iyang

ulo kay wa siya maoperahi.

`GUN-FOR-HIRE’

Laing nasikop kagahapon sa buntag human sa ginukdanay mao ang usa ka gidudahang gun-for-hire nga suspek sa duha ka mga pagpusil patay sa dakbayan.

Ang suspek nga nasikop pasado alas 6 kagahapon sa buntag human sa ginukdanay ilawom sa

taytayan sa dan Panganiban naa sa watchlist sa CCPO.

Ang suspek nga si Arnel “Budlat” Gomez, 35, taga dan Balagtas, ning dakbayan, nakuhaan og granada, KG 9 machine pistol, mga bala, usa ka kalibre .45 nga pistola, mga bala, mga camera, ug mga drug paraphernalia.

Laing nasakmit mao ang motorsiklong itom nga Yamaha (4817QR) ug usa ka itom nga Honda Wave (GL 6849).

Nakaeskapo ang kauban ni Gomez nga nailhan sa alias nga “Opao”.

Siya ang suspek sa pagpusil patay kang Michael Louie Moralde, 36, taga Sityo Abuno, Pasil niadtong Pebrero 16 ug sa kanhi sakop sa barangay intelligence network (BIN) nga si Catalino Entoma, 39, nga gipusil mga alas 12:30 sa udto sa samang adlaw.

Nanghimakak si Gomez sa pasangil batok kaniya kay kon siya pa ang killer, di siya magpanuko sa pag-angkon.

GUKDANAY

Si PO1 Jameller Palanas ug PO1 Monique Cabanero sa car 011 nahinabi sa Sun.Star Superbalita nagkanayon nga nagpatrolya sila sa dalan Sanciangko-Panganiban sa dihang gipara sila sa mga tawo ug gipahibawo nga adunay armadong mga tawo sa dapit.

Girespondehan kini sa car 011 ug sa ilang paghunong, ilang nasigpatan si Gomez nga mihulga nga molabay og granada sa mga tawo ug adunay gikumkom sa iyang mga kamot.

“Diha na mi sa duol, nakalingi namo nang mga suspect hangtud nga nanagan ug among gigukod. Nangayo mi og back up sa among mga kauban,” matod pa ni PO1 Palanas.

Niabot sa dapit ang mga Motorcycle Response Unit, dugang mga sakop sa Mobile Patrol ug mga sakop sa Special Weapons and Tactics (SWAT) hangtod nga nahitabo ang ginukdanay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph