2 ka kinawat nga motor nabawi

ANG kapulisan sa lungsod sa Bansalan milampos sa pagsikop sa usa sa duha ka mga suspek ug pagbawi sa kinawat nilang mga motorsiklo.

Mga otoridad nihimo gilayon og checkpoint human nadawat ang alarma nga moagi sa ilang detachment ang duha ka mga suspek kinsa nagsakay og kinawat nga motorsiklo.

Mga suspek nagdali sa pag-atras human nakit-an ang mga nagbantay nga pulis mao nga nahitabo ang ginukdanay.

Ang insidente nahitabo banda alas 4 sa sayong kabuntagon, kagahapong adlawa didto sa Barangay Kinuskusan, lungsod sa Bansalan, Davao del Sur.

Nasikop ang usa sa mga suspek nga mao si Julius Aniñon Medrano, 24, minyo ug lumolupyo sa Barangay Bacaca, lungsod sa Kiblawan. Apan nilampos ang usa ka wa pa mailhing suspek nga makasibat kinsa paspas nga nidagan human gibiyaan ang motorsiklo.

Mga motorsiklo nga pulos kolor itom, Honda XRM (plate number MK-1881) ug Honda RS 125, anaa na sa kamot sa kapulisan.

Nahitabo ang pagsikop sa suspek human gi-alerto ang kapulisan nga mga suspetsadong karnaper padung sa direksyon sa probinsiya sa Cotabato gikan sa lungsod sa Bansalan.

Alerto ang kapulisan sa lugar human sagunson na ang mga nahitabong pagkahanaw sa mga motorsiklo. Nagpahimangno sab ang kapulisan ngadto sa mga drayber nga di mag-kompiyansa pagbilin bisan asa sa ilang mga motorsiklo sanglit gisaulog karong adlawa ang ika-58 nga Araw ng Bansalan ug gilantaw nga modagsa ang mga kawatan. (Dondon Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph