2 ka mga bata nangapaig sa sunog

NANGAPAIG ang 3 ug 4 anyos nga mga batang lalake nga managsilingan samtang gituohang namahaw sulod sa balay mga alas 8:00 kagahapon sa buntag sa Barangay Catolohan, lungsod sa Dalaguete, Sugbo.

Nauling ang lawas nila ni John Mark Jorolan, 3, ug Jayden Sydney Indig, 4, human kalit nga niulbo ang kayo sa balay ni Anastacio Acenjo, 51, biyudo, mag-uuma, apuhan ni Indig.

Si PO3 Maximo Belceña, imbestigador sa Dalaguete Police nga nahinabi sa Sun.Star Superbalita, nagkanayon nga ang mga biktima nanagduwa sa wa pa ang sunog.

Apan way nakakita kon nagduwa ba silag posporo sanglit ang inahan mismo sa 3-anyos nakakita pa sa iyang anak nga nagduwa sa gawas una pa nisulod sa balay.

Samtang ang apuhan nga si Anastacio wa sab atol sa insidente human gibilin sa mga ginikanan ang iyang apo sanglit didto sa iyang umahan sa bukid.

Ang mga silingan nakabantay nga nasunog ang balay ni Acenjo daling ningtabang apan wa na nila madalag bubo sa tubig ang kayo sanglit dali kaayong nikatap sa balay nga ginama sa light materials.

Matod ni Belceña nga duol ra untag tunghaan ang lugar ingon man mga silingan apan tungod sa kapaspas sa pagkatap sa kayo, wa gyud maluwas ang mga bata.

Samtang ang kapulisan ingon man kabomberohan mga alas 2:00 na sa hapon nahibawo sa maong insidente tungod sa kalayo sa lugar nga gibana-banang 23 kilometros ang gilay-on gikan sa Poblacion.

Ang mga bata nga nangapaig diha sa lamesa sa kusina dihang napalgan hinungdan nga nagtuo ang kapulisan nangaon kini sanglit dunay kan-on sa ilang mga kamot.

Hinuon wala maestablisar kon unsay sinugdanan sa sunog, apan ang maong lugar duol sa mga sinina nga posibling gidakop sa kayo ug miulbo.

Nasuta sa kapulisan nga ang balay duna hinuoy linya sa kuryente, apan nagpadayon pa ang ilang imbestigasyon niini ingon man pakig-alayon sa bombero.

Si PO2 Godofredo Glepa nga nahinabi sa Sun.Star Superbalita niingon nga usa ka Barangay tanod nga si Marlo Becbec nagkanayon nga naglakaw siya sa karsada niadtong higayona dihang kalit niyang nakit-an ang balay sa iyang silingang miulbo.

Hinungdan nga dali siyang nitabang sa pagpawong sa kayo uban sa iyang mga silingan.

Nisuway siya pagsulod sa balay aron luwason ang mga bata apan wa na siyay mahimo tungod sa kainit gumikan sa pag-ulbo sa kayo.

Ila na lang nabati uban sa mga silingan ang paghilak sa mga batang biktima.

Sa nakuhang impormasyon sa Sun.Star Superbalita, ang amahan sa 3 anyos nga si Gerald nagmaniho og habal-habal niadtong higayona.

Samtang ang ginikanan ni Indig nagtrabaho atol sa insidente.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph