2 sundalo patay sa landmine

DAVAO DEL NORTE - Duha ka mga sundalo ang napatay human mibusikad ang landmine nga gitanum didto sa Sitio Kapatagan, Barangay Gupitan, Kapalong alas 7 sa buntag, kagahapon.

Patay dayon sila si Private First Class Fernando L. Mendoza ug si PFC Elvero I. Batacandolo samtang naangol sila PFC Genesis R. Celestial, PFC Alfon A. Rocaberte, PFC Rolan V. Parac, PFC Travinio A. Dennis, ug lain pang duha.

Nasayran nga mga sundalo mga sakop sa 60th Infantry Battalion sa Philippine Army nga nakabase sa Dona Andrea Asuncion.

Gibaybay sa mga sundalo ang sitio aron mopahigayon og survey unsa nga serbisyo ang gikinahanglan sa katawhan dihang gipabuthan og landmine sa gituohang mga rebeldeng New People's Army (NPA).

"Kaya nga broad daylight yung pagpunta nga mga sundalo natin dun kasi hindi combat ang sadya. Alas syete po yun ng umaga. The NPA took advantage of the situation," komento na lamang ni Capt. Ernest Carolina, Public Affairs Officer, 10th Division, Agila.

Kabahin matud pa sa ilang pagpahigayon sa Internal Peace-Bayanihan ang tuyo sa maong mga sundalo sa maong lugar.

Hangtud sa kasamtangan, wala pay opisyal nga pamahayag ang NPA kabahin sa maong panghitabo. (Domilyn R. Pico)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph