2 tiguwang nalitson

DUHA ka mga magtiayong tiguwang napatay human naugdaw ang ilang bay didto sa Purok 1, Barangay Pobacion, lungsod sa Montevista, Compostela Valley (Comval) Province, Huwebes sa kaadlawon.

Nailhan ang mga biktima nga mao sila si Gonzalo Licera 98, ug si Candida Licera 87, ug molupyo sa susamang dapit.

Sa report gikan sa Comval Province Police Provincial Office nasayran nga pasado alas 2 sa kaadlawon nasunog ang balay sa mga biktima didto sa maong lugar.

Apan sa wa masayring hinungdan gikatahong wa nakagawas ang mga biktima sulod sa ilang balay ug naapil sila og kasunog.

Way nakatabang sa duha ka tiguwang sanglit sila lamang ang nagpuyo sa ilang bay Tulin nga mikuyanap ang kayo ug naugdaw ang tibook bay sa mga biktima.

Miresponde ang mga bombero ug milungtad sa kapin duha ka oras nila nga pakigbugno sa kayo una nakonsederang fire out ang dapit.

Migawas sa inisyal nga pakisusi sa mga otoridad nga napasagdang lampara ang hinungdan sa sunog.

Gibana-banaan sab nga miabot og kapin P2-milyones ang kantidad sa mga kabtangan ang nadanyos sa maong sunog.

Patay'ng lawas sa mga biktima gipahiluna sa usa ka punerarya sa lungsod sa Montevista.

Mga otoridad mihimo na og dugang imbistigasyon sa maong hitabo. (Marvin Pineda)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph