22 ka stalls gisirhan

HUMAN giaprobahan sa Cebu City Market Authority, wa kini maglangan sa pagkandado sa mga stall nga wa makakuha og contract of lease sa T. Padilla public market sa Barangay T. Padilla, dakbayan sa Sugbo.

Si Raquel Arce, market administrator, uban sa Market Operation Division, maoy nangunay sa pagsira sa 22 ka mga stall nga wa makakuha og contract of lease gikan sa market office gumikan sa nagkalainlaing rason.

Ang contract of lease makuha sa legitimate vendor kon makabayad na sila sa ilang business permit, ug uban pa nga rekisito sa market authority.

Ang mga stall nga gipadlakan gilangkuban sa wet market, carenderia, grocery ug uban pa.

Si Arce, sa pagpakighinabi sa Sun.Star Superbalita, nagkanayon nga sa wa pa nila hingpit pasirad-i ang maong mga stall, gipadad-an una kini og mga notisya gikan sa market office alang sa pormal nga pagpahibawo sa ilang obligasyon.

Apan nilapas ang usa ka semana nga tagal ug wa gihapon maatiman ang ilang tulubagon sa siyudad hinungdan sa pagpasirado sa ilang mga tindahan.

Ang market administrator nitug-an nga adunay managlahing mga rason ang matag vendor.

Matod pa ni Arce nga hinay og halin ang uban nga mga tindahan samtang ang uban adunay mga problema sud sa ilang tagsa-tagsa ka mga pamilya ug uban pa.

Karong adlawa lain na usab nga mga stall ang tak-opan sa MOD gumikan gihapon sa kapakyas pagkuha og contract of lease.

SunStar Publishing Inc.
www.sunstar.com.ph