2,394 balay ang nasunog sa 3 ka barangay: CSSDO

BASE sa parsyal ug di pa opisyal nga taho sa City Social Services and Development Office (CSSDO) kagahapon sa udto, mikabat na sa 2,394 ka panimalay ang naugdaw sa pinakadakong sunog nga milungtad og lima ka

oras ug 20 minutos sa tulo ka mga barangay sa siyudad sa Davao niadtong Biyernes sa gabii.

"The total number of houses affected is 2,394. Totally damaged families -- 2,371; and partially damaged families -- 23," sulti ni City Social Services and Development Office (CSSDO) City Poblacion District -- B head Social Welfare Officer Vergie Bautista sa iyang mensahe sa text kagahapon sa udto.

Sa kinatibuk-ang ihap, suma ni Bautista, ang house owners mikabat sa 2,394; ang sharer -- 77, renters -- 44, boarders -- 120, caretaker -- 3, ug absentee owners -- 3.

"And the estimated damaged is P66,507,522 as of this morning," dugang ni Bautista.

Nasayran nga samtang gisuwat kining balita, padayon pa ang gihimong tagging sa mga personahe sa CSSDO sa mga lugar diin nahimutang ang balay sa mga nasunogan.

Mga biktima gipahiluna sa evacuation centers sa Rizal Elementary School, Roxas Elementary School, Quezon Elementary School, Barangay 23-C covered court, Barangay 22-C covered court, ug Magsaysay Park.

Si Mayor Rodrigo Duterte, sa iyang programang Gikan sa Masa, Para sa Masa, nagsulti kagahapon nga tabangan gyud ang tanang biktima sa sunog sa tulo ka mga barangay.

"Motabang man gani ta sa ubang probinsiya sa Luzon, Visayas ug Mindanao, samot na diri sa ato. I already asked the City Council to act on it. So, tabangan sab nato sila," tipik sa pahayag sa mayor, kinsa nagpasabot sa gihimong pagtabang sa siyudad sa mga biktima sa Bagyong Pablo sa Compostela Valley ug Davao Oriental, ug Bagyong Yolanda sa Visayas sa miaging mga tuig.

Dihang gipangutana kon tugutan pa ba nga makabalik ang mga residente sa ilang gipuy-an, si Duterte nagsulti nga, "Yes, of course."

Giklaro sab sa mayor nga way nahitabo nga dunay gidunggab nga bombero kay wa giatiman ang balay sa nanunggab.

"I was there but nothing happens. Gusto nila bitaron ang bombero. Pero gamay ra man ang makasulod didto tungod sa kaguot sa dalan. I understand the emotional outburst," sulti sa mayor.

Nagsugod pagsilaob ang kalayo alas 8:00 pasado sa gabii niadtong Biyernes sa balay ni Tisay Muhamad, residente sa Isla Verde, Barangay 23–C Poblacion.

Nasayran subay sa inisyal nga imbestigasyon sa kapulisan, ang hinungdan sa sunog mao ang nabiyaan nga kandila.

Gibutyag ni Davao City Police Office director Sr. Supt. Vicente Danao, Jr. nga nakadawat siya og taho nga dunay nag-pot session sa lugar gamit ang kandila nga gilabay sa mga drug users nga nag-pot session sa maong lugar.

Sanglit ginama sa kahoy ang mga balay, dali kaayong mikatay ang kalayo sa kasilinganan.

Sa laing katikaran kagahapon, ang Department of Social Welfare and Development (DSWD) Region 11 nagpahibalo nga nagpagawas na sila og 3-mil ka family food packs pinaagi sa CSSDO nga dunay 2,500 ug Congressman Karlo Nograles nga nagpadala og 500 ka food packs. (AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph