25 barangay sa Oro gi-monitor

HUGOT nga gi-monitor karon sa City Disaster Risk Reduction and Management Council (CDRRMC) ang 25 ka mga barangay sa una ug ikaduha nga distrito ning siyudad sa Cagayan de Oro tungod sa Bagyong Ruby.

Si Virgil Lago, ang weather specialist sa CDRRMC ning siyudad, niingon nga ang mga kasubaan ang ilang unang nga gi-monitor aron pagsuta sa level sa tubig.

"Normal pa ang kasubaan tungod kay wala pay ulan sa kabukiran apan dili mokompyansa kay posible gihapon nga makatagamtam kita og pag-ulan ug hangin," butayg ni Lago dihang gihinabi sa dxIF Bombo Radyo.

Andam na ang mga evacuation center ning siyudad sama sa mga tunghaan ug mga covered court nga mahimong bakwitan sa mga residente nga maapektohan sa posibleng pagbaha.

Samtang pipila ka mga tunghaan sulod sa Rehiyon 10 ang gisuspenso na ang mga klase tungod sa Bagyong Ruby.

Sulod sa Rehiyon 10 ang mga dapit nga gisuspenso na ang mga klase mao kining mosunod: sa Misamis Oriental, Iligan City, Gingoog City walay nay klase sa tanang level; sa Malaybalay City, Oroquita City, Ozamis City walay klase sa pre-school ngadto sa High School samtang sa Camiguin walay klase sa pre-school kini tungod sa storm signal number 1.

Samtang ang Department of Public Work and Highways hugot usab nga pagpangandam ang gihimo karong panahona tungod sa hulga sa panahon.

Si DPWH-Northern Mindanao Director Evelyn T. Barroso nimando sa tanang district engineers sa 12 ka mga District Engineering Office nga moadto sa ilang mga area ug mangandam uban sa mga ekipo, mga sakop ug ubang mga kinahanglan nga suporta enkaso nga moigo ang Bagyong Ruby sa Rehiyon 10.

Ang tanang mga department engineers, mga assistant department engineers, ug mga maintenance engineers walay gitugotan nga mopaubos sa leave of absence sugod kagahapong adlaw ug gimandoan sa kanunay nga pagbukas sa ilang mga cellphones alang sa dali nga pagdawat ug pagtaho sa bisan unsang kalamboan sa stiwasyon.

Alang sa bisan unsang kinahanglan may kalambigitan sa mga national roads ug mga tulay sa rehiyon mao kini ang hotlines sa DPWH, 165-02 ug alang sa pagpadala og mensahe, text 2920, o tawag 0916-348-1429.

Samtang ang Department of Social Welfare and Deveopment (DSWD) duna nay naka-andam nga 30,000 family food packs ug P1,000,000 nga naka-standby nga pundo alang sa disaster operation.

Sa ulahing taho, mikusog ug mihinay pa ang Bagyong Ruby samtang paduol kining kayutaan. Ulahing nasigpatan ang sentro sa bagyo sa gilay-ong 500 kilometro sa sidlakan sa Borongan, Eastern Samar.

Duna kini gikusgan sa hangin nga 215 kph duol sa tunga ug pagbwelo nga 250 kph. Lauman nga mo-landfall kini sa eastern Samar Sabado sa gabii o Domingo sa buntag.

Nakaisa karon ang signal number 2 sa Sorsogon, Ticao island, Masbate, Northern Samar, Eastern Samar, Samar, Biliran, Leyte, Southern Leyte, Northern Cebu, Cebu City, Bantayan island, Camotes island, Surigao del Sur, Agusan del Norte, Surigao del Norte, Dinagat island ug Siargao islands.

Public storm signal number 1 usab sa Catanduanes, Albay, Camarines Sur, Camarines Norte, Burias island, Romblon, Capiz, Iloilo, Negros Oriental, Negros Occidental, nahibiling bahin sa Cebu, Siquijor, Bohol, Misamis Oriental, Agusan del Sur ug Camiguin island. (JLB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph