28 nangasikop sa buy-bust

MOKABAT ngadto sa 28 ka mga tawo, lakip niini ang duha nga maoy subject sa operation, ang nangasikop atol sa gipahigayong buy-bust sa National Bureau of Investigation  (NBI) 7 sa barangay Ermita, dakbayan sa Sugbo.   

Sa 28 ka mga tawo nga nadakpan sa NBI niadtong Lunes, 22 niini ang nipositibo sa drug test nga gipahigayon sa maong ahensiya.

Kagahapon, gipahibalo sab sa NBI 7 nga human sa inventory nga ilang gihimo, moabot na sa 120 ka mga gagmayng pakete sa shabu ang ilang nakuha sa giingong shabu tiange nga gipanag-iya ni Rodelito Cabejir.

Si Cabejir maoy subject sa buybust operation nga nalakip sa pagkasikop kauban sa giilang si Dexter Suarez.

Gawas sa mga gag­may’ng pakete sa shabu, nakuha usab ang duha ka dagkong bulto sa gidudahang gihapon nga shabu. 

Matod sa direktor sa NBI 7, Atty. Max Salvador nga ang gihimo nila nga operasyon, kabahin sa ilang kampanya pagsumpo sa problema sa illegal nga drugas dinhi sa Rehiyon 7.

Usa ka buwan nila gipanid-an ang kalihukan sa suspek una pa sila mipahigayon og buy-bust operation sa maong dapit og iyang gihulagway ang suspek  nga untouchable  drug personality dinhi sa dakbayan sa Sugbo.

Atol sa pag-rumbo sa NBI 7 sa Ermita, daghan ang ilang mga naabtan nga giingong parokyano ni Cabejir, apan pipila kanila ang nanghimakak nga apil sila sa maong illegal nga kalihukan.

Ang dinakpan nga si Rey Barlisan, kinsa usa ka sikyu sa dakbayan sa Mandaue, miingon nga igo lang siya nga nangita og boarding house sa dapit ug nahibulong na lang siya nga giapil siya pagsikop sa mga sakop sa NBI 7.

Gawas sa shabu, nakuha sa mga sakop sa NBI ang mga drug paraphernalia, mga video karrera og moli-moli machines og unom ka mga motorsiklo.

Sa laing bahin, level 2 nga drug pusher nakuhaag gidiling drugas nga mokantidad og P354 mil sa dihang gironda ang panimalay niini kagahapon sa alas 7:25 sa buntag sa Sitio Lagang, Barangay Bolinawan, dak­bayan sa Carcar.

Si Rommel Velez, hingkod ang panuigon, nailang level 2 drug pusher, ang nasikop sa mga sakop sa Regional Anti-Illegal Drugs Special Operation Task Group (RAIDSOTG-7) ug sa Carcar Police Station.

Si Sr. Insp. Henriz Ban­coleta, sa RAIDSOTG, mibutyag nga dala nila ang search warrant nga gi-isyu ni Judge Wilfredo Navarro, human sa ilang duha ka semanang pagpaniid sa kalihukan ni Velez.

Matod pa niini nga atol sa pagpatuman nila sa search warrant wala na makadagan si Velez sanglit natulog kini atol sa pagronda.

Nakuha gikan sa sulod sa panimalay niini ang tulo ka dagkong putos sa shabu, laing duha ka medium size, ubang mga gagmayng putos, mga drugs paraphernalia, ug uban pa.

Si Bancoleta, miingon nga ang drugas, gipamasok ni Verez, sa mga sikritong butangan sama sa bongbong.

Sumala pa niini nga daghang mga reklamo sa mga residente sa dapit, mga lokal nga opisyal gumikan sa illegal nga kalihukan niini sukad pa kaniadto.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph