TULO ka mga policewoman sa dakbayan sa Talisay ipaubos sa police line-up ni Cebu Provincial Police Director Sr. Supt. Erson Digal kay usa kanila gipasanginlang protector ni Joavan Fernandez.
Kini maoy kamanduan ni Digal kang Supt. Henry Biñas, hepe sa Talisay police station human si Guillermina Barido nipasangil nga usa ka babayeng pulis sa Talisay maoy protector ni Fernandez sa iyang pagpamaligyag illegal nga drugas.
Matod pa ni Digal nga iyang paubanon si Barido sa police station sa Talisay aron ilhon ang maong police woman sa ingon matin-aw na ang isyu nga nagpasangil sa iyang mga sakop.
Si Digal niingon nga tulo ka mga policewoman ang nangadestino diha sa Talisay, usa niini bag-o pang nabutang sa maong police station samtang ang duha dugay na diha sa Talisay.
Apan base sa iyang nahibaw-an nga maayo kinig records hinungdan nga pinaagi sa police line-up maila kon si kinsa ang gitumbok nga protector ug makatabang sa ilang imbestigasyon batok kang Joavan.
Subay niini, gipahibawo ni Digal nga ilang gi-monitor karon ang kalihukan ni Joavan human nimando si Chief Supt. Ager Ontog Jr., director sa Police Regional Office (PRO-7), sa pagsusi sa giingong pagpamaligyag illegal nga drugas ni Joavan.
Sumala pa ni Digal nga ang Provincial Investigation and Branch (PIB) ug Provincial Anti-Illegal Drugs Special Operations Task Force (paidsotg) maoy iyang gitahasan sa pag-monitor sa kalihukan ni Joavan.
Ilang nahibaw-an nga tiggamitan kinig drugas apan tungod niining bag-ong kalambuan ilang gipalapdan ang pag-monitor sa anak ni Mayor Socrates Fernandez.
Subay niini giawhag ni Digal si Barido nga mosang-at gyud og kaso batok kang Joavan.
Si Barido sa interbyu sa GMA-7 Balitang Bisdak namahayag nga di gyud siya moatras gikan sa iyang mga pasangil kang Joavan bisan unsa pay mahitabo.
Iyang giangkon nga nabalaka na siyag maayo sa ilang seguridad kay matod niya nagbalikbalik sa ilang dapit ang anak sa mayor.
Subay sa maong kontrobersya ang Regional Intelligence Division (RID) una nang nipahibalo na nga duna silay ngalan sa ahente sa Philippine Drug Enforcement Agency (PDEA-7) nga giingong supplier ug protector ni Joavan sa illegal nga drugas.