3 ka trabahante nakuryentihan, 2 nangaangol

TULO ka mga construction worker ang nakuryentihan samtang sila nagtrabaho sa usa ka edipisyo kagahapon sa buntag sa dan F. Llamas, Brgy. Punta Princesa, dakbayan sa Sugbo.

Ang tubo nga ilang giyayungan nasangyad sa electric wire hinungdan nga sila nakuryentihan. Duha kanila nangadangat sa tambalan tungod sa ilang mga paso sa kalawasan.

Ang mga biktimang ningdangat sa Cebu City Medical Center (CCMC) giilang mao sila si Ricard Rosos, 37, minyo, taga Kawit, Medellin, Sugbo ug si Alwin Ancajas, 18, taga Guizo, siyudad sa Mandaue.

Subay sa imbestigasyon nga gihimo sa kapulisan sa Punta Princesa pinangulohan ni Chief Inspector Aileen Recla, hepe sa Punta police station, nagtangtang og tubo ang mga biktima gikan sa atop.

Apan gituohan nga tungod sa gibug-aton niini, wa na nila mapugngi ang tubo hangtod nga inanay kining nidahirig ug nasangyad sa linya sa kuryente.

Ang tubo gikan sa gitukod nga edepisyo nga gipanag-iya sa usa ka Jefferson Lao.

Tungod sa kakusog sa kuryente, nalabay sila si Rosos ug Ancajas nga naka-angkon og mga paso sa ilang kalawasan.

Naalarma ang mga tawo nga anaa sa palibot ug dali nilang gitawgan ang Emergency Rescue Unit Foundation (ERUF) ug gidala sila si Rosos ug Ancajas sa tambalanan.

Ang ika tulo nilang kauban, wa makuha ang ngalan, igo lang nalagpot, apan wa na kini ma-admit pa sa tambalanan tungod sa gamay nga kadaut nga na-angkon.

Si Gina Rosatase, silingan ni Rosos nga nag-atiman sa tambalanan, niingon nga luwas na sa delikado nga kahimtang ang duha ka mga biktima nga nakaangkon lang og mga paso sa ilang kalawasan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph