PADADA, Davao del Sur -- Nakauli na sa ilang tagsa ka pamilya ang tulo ka mananagat nga gikatahong nahanaw sa lawod didto sa probinsya sa Davao Oriental.
Unang gitaho nga nahanaw sila si Rustico Dura, 42; Ricardo Dura, 52 ug Timoteo LuaƱa, 60, pulos minyo ug molupyo sa Purok Bangus, Barangay San Isidro sa lugar niadtong Marso 5 sa hapon.
Gipahibawo sa mga mananagat si Ginang Francisca Dura nga nadaut ang makita sa ilang kolor blue nga bangkang panagatan nga adunay tatak nga Dura Slasher samtang anaa sila sa lawod sa Jamboree, Governor Generoso, Davao Oriental.
Apan si San Isidro Barangay Kagawad Fernando Senarillos, 40, minyo, nagpahibawo sa kapulisan nga alas 9:30 sa buntag niadtong milabay nga adlaw, luwas nang nakauli ang mga mananagat sa ilang lugar.
Hilabihan ang kabalaka sa pamilya sa tulo sanglit di na makontak ang ilang cellphone human nagpahibawo nga nakasinati og suliran ang ilang sakyanang pandagat.
Nagtinabangay ang mga biktima pag-ayo sa ilang makina hangtud nakabalik sa ilang lugar.
Dako ang pasalamat sa matag pamilya niini nga way dautang nahitabo sa mga mananagat. (Orlando Dinoy)