3 tinun-an nasudla’g dautan nga espiritu

NAGKAGULIYANG ang mga magtutungha ug mga magtutudlo sa Cotabato City National High School human nga upat ka mga estudyanteng babaye ang giingong nasudlan sa dautang espiritu sa alas 2 sa hapon, niadtong Biyernes.

Kasagaran sa mga biktima gihulagway nga manghasi, mausab ang tingog nga daw sa tigulang nga babaye, magpula ang mga mata ug kusgan kaayo nga bisan lima ka tawo maglisud sa pagpugong.

Hinuon, wala panganli ang mga biktima aron pagtago sa ilang dungog.

Gumikan sa maong hitabo, nakahukom ang Department of Education (DepEd 12) nga dili una patunghaon ang mga biktima hangtud dili sila maayo sa ilang sakit.

Matud ni Bailyn, usa sa mga biktima, nga una sila masudlan sa dautang espiritu dunay makit-an sila nga babaye nga taas og buhok nga daw aswang unya sa di madugay wala na silay mahinumduman kon unsa ang nahitabo.

Nasayran nga nagsugod ang talagsaong lihok sa upat ka mga tinun-ang babaye nga pulos sab mga barkada sa diha nga nangaligo sila sa sapa duol sa punuan sa Lomboy ug dakong Balite.

Gisulti sa mga ginikanan sa maong mga estudyante, nagsugod ang talagsaong lihok sa mga estudyante human sila makauli sa ilang balay gikan sa sapa.

Daghan nang mga albularyo ang mihiling sa mga biktima apan wala pa gyud sila maayo.

Kini maoy hinungdan nga mga ginikanan sa mga biktima nangayo karon og tabang sa mga lokal opisyal sa Cotabato aron masusi sa mga doktor kon unsa gyud ang tinuod nga kahimtang sa mga biktima. (EF)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph