3 tunghaan gihulgang bombahan

TULO na ka mga tunghaan ang gihulgang bombahan dinhi sa siyudad sa Davao.

Si Department of Education (DepEd) regional spokesperson Jenielito S. Atillo nagbutyag sa Sun.Star Davao Superbalita nga ang uwahing gihulga mao ang Davao City National High School.

Ang pagpanghulga nahitabo alas 9:00 kagahapon sa buntag pinaagi sa mensahe sa text nga nadawat ni Mrs. Balog kinsa mipahibawo sab dayon sa ilang School Principal George Wong.

Si Wong na ang mipahibalo sa kapulisan mao nga daling miresponde ang Explosive and Ordnance Disposal Team sa Davao City Police Office (DCPO) ug Task Force Davao.

Ang mensahe sa text gikan sa cellphone number 0933-725-1997 nga nagkanayon: "Pagbantay! May upat ka mga bomba nga mobuto diha sa City High karong adlawa 3 ka oras human nyo madawat kini nga mensahe".

Tungod niini, daling gipaguwa ang mga estudyante dayon gisubay ang palibot sa tunghaan aron masayran kon duna gyuy bomba.

Alas 12:00 sa udto natapos ang pagsusi sa palibot diin nasuta nga way gibutang nga bomba.

"Amo na sab gi-forward ang text ug number sa tawo nga nanghulga sa Police Regional Office 11 kay naa tay gadget niana nga ma-trace kung taga diin ang nanghulga," sulti ni Police Superintendent Elesio Malana Jr., hepe sa San Pedro Police Station.

Suma ni Atillo nga abli ang linya sa mga magtutudlo ngadto sa publiko mao nga nagduda sila nga gikan ang maong mensahe sa mga tawo nga way mahimo sa kinabuhi.

"One of our mandates to all teachers is to have an open communication line so that they could respond parents' concern," sulti ni Atillo.

Siya nagsulti nga niadtong Lunes duna say bomb threat ang Cabantian National High School sunod sa F. Bangoy National High School nga gihulga niadtong Biyernes.

"We appeal to them to please spare our children and schools from threat," pahayag ni Atillo.

Dihang gipangutana sa Superbalita kung unsa ang resulta sa imbestigasyon nila sa pagpanghulga sa Bangoy National High School, si Atillo nagsulti nga duny tulo ka mga anggulo nga ilang gisusi.

"I am not in the position to divulge," pangatarungan ni Atillo.

Unang gisusi sa kapulisan ang anggulo nga ang nanghulga mao lamang ang mga estudyante nga nag-away tungod sa ilang naguba nga proyekto. (AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph