USA ka lalaki kritikal ang kahimtang karon sulod sa ospital human gipusil sa wa mailhing suspek sulod mismo sa ilang panimalay didto sa Purok 11, Barangay Maniki, lungsod sa Kapalong, Davao del Norte, Biyernes sa hapon.
Nailhan ang biktima nga mao si Ruel Carillas, 34, ug molupyo sa Purok 11.
Sumala sa report gikan sa Davao del Norte Police Provincial Office kagahapon nasayran nga pasado alas 3:00 sa hapon samtang nagtindog ang biktima gawas sa iyang panimalay, kalit nga miabot ang duha ka wa mailhing suspek nga nagsakay sa usa ka Honda XRM nga motor ug gipusil siya biktima gamit ang wa pa matinong kalibre sa armas.
Naigo ang biktima sa nagkadaiyang parte sa iyang kalawasan ug daling gidala sa Kapalong District Hospital sa iyang mga silingan.
Apan tungod sa grabing samad nga iyang nahiaguman gibalhin ang biktima sa Davao Regional Hospital sa siyudad sa Tagum ubos sa kritikal nga kahimtang.
Mga suspek dayon misibat padulong sa wa matinong lugar human sa pagpamusil.
Kapulisan sa lungsod sa Kapalong mihimo na karon og dugang imbistigasyon sa hitabo. (Marvin Pineda)