NALUBONG nga buhi ang usa ka inahan uban sa iyang upat ka mga anak human nidahili ang yuta tungod sa kusog nga pag-ulan niadtong Lunes mga alas 6:00 sa gabii sa Barangay Lupiangan, lungsod sa Sumilao, Bukidnon.
Si PC/Insp. Regina Abanalez kinsa tigpamaba sa Police Information Office sa PNP-Davao Region nibutyag sa Sun.Star Superbalita nga gilangkuban sa pamilyang Lindongan ang nangamatay sa landslide.
Ang inahan giila nga si Perla, 45, samtang padayon pang gisuta ang mga pangalan sa anak ug edad niini.
Dugang ni Abanalez nga naa na sa puloy-anan niadtong tungora ang pamilya tungod kay walay paghunong sa ulan dihang kalit lang nahugno ang yuta ug natabunan ang pamilya.
Ang barangay kapitan sa dapit maoy nagpatabang sa kapolisan kabahin sa maong hitabo.
Dihang gi-rescue ug gikalot sa mga kapolisan sa Sumilao Police Station uban sa kasundalohan sa dapit nasutang wala nay kinabuhi ang mga biktima.
Ang amahan wala sa puloy-anan niadtong higayona kay nagtrabaho pa sa usa ka umahan sa susamang dapit ug nakurat pag-ayo sa hitabo ug dili pa makadawat ning panahona.
Nasayran nga likod sa puloy-anan sa mga biktima ang bukid nga bahin ug adunay posibilidad nga mahugno gyod ang dapit.
Sa pagsulat ning balita gihimo pa ang masusing imbestigasyon kalabot sa hitabo samtang gipanawagan usab ang paghatag og gamayng hinabang alang sa pamilya. (Stephanie V. Berganio)