ANG pagkasikop sa upat ka mga sakop sa Buak Kotse Gang gikalipay ni Davao City Mayor Sara Duterte-Carpio.
Mga suspek mao sila Joey Aguirre Masayon, 35, nagpuyo sa Silway Fatima; Melanie Gulfan Aguirre, 24, nagpuyo sa Purok Uhaw sa Barangay Fatima; Tristan Ocampo Sumaoang, 40, computer technician, nagpuyo sa Morales Subdivision, nga sakop sa General Santos City; ug Leonardo Medel Valintin, 48, nagpuyo sa Barrio Patay, Barangay Leon Garcia, Agdao District, siyudad sa Davao.
Silang upat maoy nagpaluyo sa sunod-sunod nga pagpamuak sa salamin sa mahalong sakyanan dinhi sa siyudad sa Davao, apan nasikop didto sa Barangay Dadiangas East, General Santos City niadtong Martes sa buntag.
Sa gihimong media conference, ang mayor midayeg sa mga pulis nga malampusong misikop sa mga suspek.
"I congratulate the DCPO (Davao City Police Office) for a job well done though this would not be the last operation they will conduct because to serve and protect the public is their responsibility. I'm satisfied na ginagawa nila yung trabaho nila," suma ni Carpio.
Suma ni DCPO director, Senior Superintendent Ronald dela Rosa, nga nasikop ang mga suspek pinaagi sa hiniusang pwersa sa Talomo Police Station ug Investigation and Detection Management Branch (IDMB) sud sa General Santos Suites alas 4:00 sa kaadlawon.
Mga pulis miadto sa lugar uban sa mga biktima niadtong Lunes sa gabii aron himuon ang entrapment operation human nasayud nga didto nila gibaligya ang mga kinawat nga butang.
Narekober gikan nila ang Nikon D700 DSLR digital camera, Nikon digicam lens 70-200 nga dunay serial number 436308, Nikon digicam lens 35mm, Nikon digicam lens SB-800 nga dunay serial number 2691463, Photix Battery grit D700 nga dunay serial number 33365, Nikon digicam flash nga dunay serial number 2306163, usa ka Asus laptop, Lenovo laptop, Louie Vitton shoulder bag, TODS shoulder bag, usa gold necklace nga may pendant, external hard disk, ug nagkadaiyang cellular phones.
Nasakmit sab nila ang kolor itom nga Mazda Familia Sedan nga dunay plate number UPA-579 ug kolor puti nga Mazda Familia Sedan nga dunay plate number UPW-745.
Usa sa mga biktima, Erwin Wong Tay, nagkompirma nga siya ang tag-iya sa mga nasakmit nga butang gikan sa sakyanan nga gi-parking sa Shrine Hills niadtong Oktubre 14 alas 10:15 sa buntag.
Suma ni dela Rosa nga ila nang gipanid-an ang mga suspek sukad pa niadtong Pebrero ning tuiga.
Mga suspek naglihok sab sa Luzon, Visayas, ug Mindanao, apan ang giangkon nila mao lamang kadtong nahitabo dinhi sa siyudad.
Ang rekord sa kapulisan nagpakita nga dunay 17 ka mga insidente sa pagpamuak og salamin sa mga sakyanan sukad niadtong Pebrero ning tuiga, 13 niini nahitabo sa Talomo area. (Ivy C. Tejano)