4 giluba sa usa lang ka adlaw

UPAT ka mga lalaki ang pulos biktima sa pagpangluba ug dungan nga ninglanding sa Northern Mindanao Medical Center (NMMC) ning siyudad sa Cagayan de Oro.

Unang biktima mao si Fred Eduna, 56, taga Barangay Tablon, ning siyudad ang giluba niadtong Sabado mga alas 7:10 sa gabii.

Matud sa mga anak niini nga midala sa biktima sa balay tambalanan nga wala sila masayod unsay rason nganong giluba ang ilang amahan apan giingong hubog kini atol sa insidente.

Gisuta pa usab sa kapolisan sa Police Station 6 (PS6) sa Cugman ang hinungdan sa pagpangluba.

Ikaduhang biktima mao si Ian Ceroy, 24, ulitawo, lumad nga taga Malaybalay, Bukidnon.

Nahitabo ang insidente sa siyudad sa Valencia diin ang inahan sa biktima igo na lamang nga nakadawat og tawag nga gitripan ang iyang anak ug giluba.

Pagsusi sa inahan mga alas 11:00 sa gabii niadtong Sabado sa iyang anak nagtaroy pa ang kutsilyo sa tiyan niini hinungdan gidala sa NMMC ning siyudad.

Ikatulong insidente sa pagpangluba natigayon sa Barangay Sagaran, lungsod sa Talakag, Bukidnon mga alas 9:00 sa gabii adlawng Sabado.

Giila ang biktima nga mao si Arman E. Depinde, 18, sa susamang dapit ang nakaangkon og ubay-ubay nga samad sa lawas ug anaa sa kritikal nga kahimtang ning panahona.

Natulog lamang ang biktima sulod sa panimalay niini dihang kalit lang nga gisaka sa gibana-banang upat ka mga lalaki.

Deretsong giluba ang natulog nga biktima ug human sa insidente daling mibiya ang mga suspek.

Nakapangayo pa og tabang sa iyang mga silingan ang biktima hinungdan daling gidala sa duol nga balay tambalanan ug giduso sa NMMC ning siyudad. Ang kaso gisunod na sa Talakag Police Station.

Uwahing biktima mao si John Raymund Lacsao, 16, taga San Lazaro, Lapasan ning siyudad.

Giluba ang biktima samtang nagtambay kuyog ang mga higala mga alas 8:15 sa gabii diha sa Mac Arthur Park, Velez ning siyudad.

Gisaysay sa mga higala nga igo lamang sila naglingkod dihang kalit lang miduol kanila ang grupo sa mga lalaki sa pikas lingkoran ug deretso sila gipanukmag.

Si Lacsao ang kalit lang giluba sa iyang sampot nga bahin sa usa ka lalaki nga aduna diay dala nga kutsilyo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph