40 anyos gibanlas sa baha

NAGPABILIN nga missing niining panahona ang giingong usa ka habal-habal driver human gianod sa kusog nga bul-og sa baha niadtong Domingo sa Barangay Gango, lungsod sa Libona, Bukidnon.

Giila ang biktima nga mao si Nelson Dimasito, 40, residente sa susamang lungsod diin panginabuhian sulod sa pila ka tuig mao ang giingong pagpamasayro sa dapit.

Sa inisyal nga imbestigasyon sa Impasug-ong Police Station, nasuta nga kusog kaayo ang ulan ug nagbaha na niadtong tungora gumikan sa nasinati sa rehiyon nga low pressure area.

Sakay ang biktima niadtong tungora sa iyang bag-ong motorsiklo ug gani daw gibadlong pa kini nga dili na lamang motabok sa suba kay kusog na kaayo ang bul-og sa tubig ug basin kini mabanlas.

Apan daw miingon ang biktima nga anad na siya sa mga sitwasyon nga susama niini ug mao na lamang nasuta nga gianod na sa kusog nga baha ang biktima ug naapil pa ang giingong motorsiklo nga gisakyan niini.

Sa pagsulat ning balita, pabilin pa nga missing ug gipangita pa sa mga rescuer ang biktima. Nasuta nga sumpay sa suba nga giagian niini mao ang Bigaan River diha sa Barangay Cugman ug Barangay Gusa ning siyudad sa Cagayan de Oro. (SVB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph