5 rebeldeng NPA dakpan

KORONADAL CITY - Lima ka miyembro sa New People's Army (NPA) ang nadakpan sa militar alas 10 sa buntag niadtong Sabado.

Naila ang mga rebelde nga sila Jonisel Paladisa nga dunay kaso nga treason, double frustrated murder ug illegal possession of explosives gumikan sa pagdala-dala og landmine; asawa niya nga si Jenievive Sundo nga lima ka bulan nga buntis; Ereneo Amajado, alyas Julius; Aldrin Kundiman nga mga molupyo sa Malalag, Davao del Sur, ug Isabel Muay nga taga Barangay Colonggulo, Surallah.

Nasayran nga sa wala pa masikpaw ang grupo ni Paladisa, nagka-engkuwentro una ang mga sakop sa 27th Infantry Battalion sa Philippine Army batok sa mga rebelde didto sa maong barangay.

Ang pinusilay miresulta sa pagkamatay sa usa ka rebelde nga naila nga si alyas Ka Ben.

Ang lima ka rebelde misurender sa militar sa dihang nalibutan na ang ilang nahimutangan sa mga sundalo.

Moabot sab ngadto sa 160 ka pamilya ang namakwet sa kahadlok nga maipit sa kagubot ug temporaryong nagpahimutang sa Colonggulo National High School.

Dako sab ang pagtuo ni Colonggulo barangay chairman Jeryl Talaman nga mas motaas pa ang ihap sa mga bakwet gumikan sa nagpadayon nga operasyon sa militar sa maong dapit batok sa mga NPA.

Sa kasamtangan, nagpaabot na og hinabang sa mga apektadong pamilya si South Cotabato Governor Arthur Pinggoy. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph