6-anyos gianod sa sapa, nalumos

NALUMOS ang usa ka 8 anyos nga batang lalake human mahulog sa Mahiga Creek habig sa Brgy. Banilad, dakbayan sa Mandaue, atol sa kusog nga uwan kagahapon sa hapon.

Ang bata giingong naligas samtang naglakaw sa gamay nga taytayan nga ginama sa kahoy pasado alas 3:00 kagahapon sa hapon atol sa pagbunok sa uwan.

Ang biktima giila nga si Kurt Cabucos, taga sityo Oril, Brgy. Banilad, dakbayan sa Mandaue.

Atol sa pagbunok sa uwan, naligo ang bata uban sa iyang igsuon ug mga silingan apan naligas sa taytayan nga kahoy nga ilang agianan ug nahulog sa sapa nga naatol usab nga taas pa kaayo ang tubig tungod sa kusog nga uwan.

Igsuon sa biktima niuna sa pag-uli kaniya.

Ang taytayan dunay gihabugon nga mga dos metros gikan sa tubig.

Usa ka John Anthony Lucero nga taga didto ra usab sa lugar mao nay nipahibawo ngadto sa ilang mga silingan.

Nasayran nga naanod pa ang bata ug didto na makit-i sa usa ka haligi sa balay nga nagbarog usab sa sapa diin kini nasangit.

Dali untang gidala ang bata nga nanglagom na sa Mandaue District Hospital, apan nakabsan gyod kini sa iyang kinabuhi.

Ang apohan nga si Alberto Cabucos niingon nga wala siya makahibawo nga naligo diay ang iyang apo sa uwan.

Si Renante Cabucos, amahan sa biktima, kinsa gikan pa sa trabaho, naglisod sa pagdawat sa gidangatan sa iyang anak.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph