6 ka barko sa Island gidid-an pagbiyahe

GIPANGGA-ID na ang mga barko sa Island Shipping Corporation sugod kagahapon sa hapon human gipatuman na sa Maritime Industry Authority sa Central Visayas ang suspension order nga gimando ni Secretary Mar Roxas sa Department of Transportation and Communication pagsuspenso sa biyahe sa unom ka mga barko sa maong kompaniya.

Kini human nasunog ug nalunod ang mv Island Fast Craft I sa kalawran sa Lawis Ledge habig sa dakbayan sa Talisay sa lalawigan sa Sugbo niadtong Dominggo sa udto.

Si Alex Tan, presidente ug tag-iya sa Island Shipping nitug-an sa Sun.Star Superbalita kagahapon nga nadawat nila ang suspension order gikan sa Marina pasado alas 2 sa hapon.

Apil sa gisuspenso ang LCT Island 1 ug 2, Super Island Express 2, Island Roro I, mv Super Island Express 2 ug mv Island Express 5.

Matod ni Tan nga nasugdan na ang re-inspection sa mga tinugyanan sa Marina-7 sa LCT Island 2, Island Roro I ug Super Island Express 2 kagahapon sa hapon human na-serve ang suspension order.

Siya nanghinaut nga malibkas dayon ang suspension order batok sa ilang mga barko gumikan kay daghang mga sektor ang maapektuhan kon dugay makabiyahe og balik ang ilang mga barko.

Sama ni Tan, nanghinaut si Gob. Gwen Garcia nga dili usab magdugay ang suspension order tungod kay maghatag kini og negatibong impact sa kahimtang sa ekonomiya sa tulo ka mga lungsod sa isla sa Bantayan.

“I hope such suspension will be prioritized. Because this will definitely affect again sea traffic especially our riding public,” padayag ni Garcia dihang gikuhaan og reaksyon sa mga tigbalita.

Ang mga barko ug fast craft sa Island Shipping Corp. magbiyahian sa Bohol-Cebu ug vice versa ingon man gikan sa Hagnaya wharf paingon sa isla sa Bantayan.

Si Bantayan Vice Mayor Geralyn Cañares nagkanayon nga nipalabang og resolusyon ang ilang konseho nga naghangyo sa Marina nga hatagan og prayoridad ang pagsusi sa mga barko sa Island Shipping.

“Para makadagan dayon og balik kay mabalda man gud ang negusyo sa isla sa Bantayan nga nagsalig sa mga roro vessels sa Island Shipping, labi na ang mga pasahero, kay suki-suki man gud na sila, “ panghinaut ni Cañares.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph