6 ka tawo gidagit

DUHA ka mga British nationals ug laing upat ka mga Pilipino ang gikatahong gidagit sa wa mailhing mga lalaki dinhi sa siyudad sa Davao niadtong Dominggo.

Mga biktima mga gikatahong gidagit mao sila Marco Bennett ug Graham Walker samtang ang ilang mga kauban nga mga Pilipino mao sila Alexander Manalo, Benjamin Gabriel Manalo, Elaine Mondejar ug Bella Marie Labrastida.

Ang maong hitabo nasayran human midangop sa San Pedro Police Station si Katrine Manalo.

Si Manalo nagbutyag nga nakadawat siya og mensahe pinaagi sa text gikan sa wa nagpailang lalaki kinsa nangayo og salapi bugti sa kagawasan sa unom ka mga biktima.

Nasayran nga ang mga biktima gikan sa Pinnacle Hotel niadtong Dominggo sa gabii diin sila gikuha sa usa ka Remy sakay sa usa ka van nga dunay plate number SWJ-169.

Si Manalo nagsulti nga ang unom nagpahibalo kaniya pinaagi sa telepono nga mobalhin sila sa Apo View Hotel.

Dihang gisusi ang maong hotel, nadiskubrehan nga ang unom wa misud sa maong hotel niadtong gabhiona.

Alas 10:00 sa gabii niadtong Dominggo, mga biktima nagpahibalo kang Manalo nga padulong ang mga biktima sa Shakeys sa dalang Governor Duterte, ning siyudad.

Dihang gipakisayran ang guwardiya sa maong establisemento, siya nagbutyag sa mga otoridad nga wa siya nakakita og mga langyaw nga nagsakay sa maong sakyanan niadtong gabhiona.

Giingon nga mga alas 11:00 sa gabii dunay lalaki nga nanawag kang Manalo kinsa nagmando nga di ipahibalo ang pagkadagit sa iyang duha ka mga igsuon ug mga higala.

Sayo sa buntag kagahapon, usa ka wa nagpailang lalaki ang nanawag kang Manalo kinsa nangayo og salapi bugti sa kaluwasan sa mga biktima.

Sa usa ka mensahe sa text, si Davao City Mayor Sara Duterte nagbutyag nga ang gikatahong pagpangdagit di pa kompirmado.

Ang mayor nagbutyag nga naglibog sab ang mga otoridad sanglit di managsama ang pahayag ni Manalo.

"May report of alleged kidnapping of 6 persons. Alleged kidnapping in Davao and alleged release in Tagum City cannot be confirmed by both Davao and Tagum police. Upon verification, several inconsistencies were noticed with the lady complainant, who also could not produce the victims," pahayag sa mayor.

Si Police Senior Inspector Ronald Lao, hepe sa Sta. Ana Police Station, kinsa maoy nagdala ni Manalo didto sa San Pedro Police Station aron ipatala ang maong hitabo nagbutyag nga di klaro ang pahayag ni Manalo.

Si Lao gitawagan sa Superbalita aron pakisayran kung unsa ang inisyal nga impormasyon nga iyang nahipus gikan kang Manalo kinsa unang midangop ngadto sa Sta. Ana Police Station.

Sanglit ang dapit diin gikatahong gidagit ang mga biktima sakop man sa presinto dos, gihatud sa maong opisyal si Manalo didto kang Police Chief Inspector Caezar Cabuhat sa San Pedro Police Station.

Sa gihimong press conference sa City Hall kagahapon sa buntag, si Mayor Duterte nagbutyag nga di pa klaro kanila ang pagpangdagit nga nahitabo sanglit di managsama ang pahayag ni Manalo.

Ang mayor nagkanayon nga base sa pagsusi sa mga otoridad sa mga dapit nga gisulti ni Manalo, negatibo ang resulta niini ug wa sab mangayo kaniya ang British Embassy bahin sa hitabo. (Alger Dura/Ben Tesiorna)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph