6 nanghinas naigo sa kilat

DAVAO DEL SUR -- Dako ang pasalamat sa unom ka mga biktima sa ikaduha nilang kinabuhi sanglit naluwas sa kamatayon human naigo sa kilat didto sa Barangay Coronon, lungsod sa Sta. Cruz niadtong Lunes sa gabii.

Mga biktima giila nga mao sila Kokoy Mohammad, 23; Nonito Cayoga, 22; Dan Bautista, 22; BenJack Dalios, 14; Allan Enoc, 19; ug Joel Cayoga, 34, pulos molupyo sa lugar.

Ang unom daling gitambalan sa Davao del Sur Provincial Hospital.

Gisaysay ni Cayoga nga banda alas 8:30 sa gabii, nagkasabot sila sa iyang mga kauban nga manginhas daplin sa baybayon tungod kay dako ang hunas.

Matud ni Cayoga nga kalit lang mikusog ang hangin nga gi-ubanan sa makusog nga uwan samtang nanguha sila og kinhason.

Tungod sa katugnaw nga ilang gibati kay nabasa na sila sa uwan nakahukom sila nga mopasilong una ilawom sa punuan sa lubi.

Samtang nagpasilong sila, kalit lang milanog ang masipang paka sa kilat nga miigo sa katapad nga laing punuan sa lubi diin sila nahimutang.

Gumikan sa insidente, suma ni Cayoga, nakuryentehan ug nakuyapan ang uban kanila kinsa nahiagom og mga samad sa kalawasan mao nga gitabang sa mga silingan.

"Nalagpot ko sa akong gibarogan. Mga tulo ka dupa gyud kay pwerteng kusoga sa boto mura'g bomba," pahayag ni Cayoga.

Gihulagway niya nga silang tanan nga nagpasilong sa lubi daw gipanglabay gumikan sa kakusog sa lipak nga miigo sa ilang duol.

Hinuon, anaa na sa luwas nga kahimtang ang mga biktima sanglit minor injuries lang ang naangkon.

Dako ang ilang pasalamat sa Diyos nga gihatagan pa sila og laing kinabuhi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph