64-anyos nga drayber giplitehan og kinumo

COMPOSTELA VALLEY -- Maayong pagkawingig sa nawong sa 64-anyos nga trisikad driver human nga gisumbag sa hubog nga pasahero didto sa Purok 3, Crossing Gabi, Barangay Poblacion, lungsod sa Compostela.

Ang biktima naila sa pangalang Bords Balansag, ulitawo, ug residente sa Barangay Poblacion sa maong lungsod.

Sa pakighinabi sa Superbalita, ang biktima nagbutyag nga misakay ang pasahero uban iyang asawa alas 9:00 sa gabii niadtong miaging adlaw gikan sa sentro sa Barangay Poblacion paingon sa Purok 3, Crossing Gabi.

Dihang mikanaog na sila, kalit lang gisumbag ang drayber.

"Nakalitan ko kay kalit ra man og sumbag, wa ko nakabantay, mao nga akong gikanaog ug gibigwasan sa tiyan og dayon gisipa," sulti ni Balansag.

Giingon niya nga nasukamod ang hubog dayon iyang gisegundahan sa laing makusog nga upper hook.

Ang asawa sa suspek, suma pa, naghilak nga gialalayan ang bana nga daw nahuwasan sa kahubog.

Si Balansag nagsulti nga iya nalang gipasagdahan ang suspek nga mipalayo uban sa asawa nga wa miplite.

Ang maong hitabo, suma pa niya, sagad masinati sa mga trisikad ug pedicab drayber nga nagabiyahe sa maong lungsod hinungdan nga ang uban mobalibad nalang nga mopasakay kung makita nila nga hubog ang pasahero. (Dexter T. Vicitacion)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph