671 ka mga pamilya namakwet sa NorCot

MIABOT sa 671 ka pamilya sa North Cotabato nga namakwet human sa nahitabong katag-katag nga panag-engkwentro sa Moro Islamic Liberation Front ug Moro National Liberation Front.

Base sa nahagpat nga taho gikan sa Municipal Social Welfare and Development Office (MSWDO) sa Kabacan, nagdumili pa sa pagbalik ang libuan ka mga sibilyan sa ilang mga pinuy-anan didto sa Barangay Semone ug Nangaan sa kahadlok nga subling magka-engkwentro ang grupo ni Kumander Keneg sa MILF ug Kumander Datu Dema-ambil sa MNLF.

Gawas sa duha ka barangay nga sentrong naapektuhan sa kagubot, namakwet sab ang mga molupyo sa Barangay Pisan, Simbuhay, Lanoon ug Carmen, gumikan kay ilang namatikdan ang pagdaghan sa mga rebelde nga posibling nangandam sa halapad nga pagpangatake.

Padayon nga nakadawat og hinabang ang mga bakwet gikan sa buhatan ni Kabacan Mayor George Tan, Cotabato Governor Emmylou Talinio Mendoza ug sa international Commitee of the Red Cross (ICRC).

Mokabat na sab sa upat ka mga tawo ang namatay samtang 7 ang naangol sa pinusilay sa magka-away nga grupo.

Gitakda nga mag-abot ang mga taas nga opisyal sa MNLF ug MILF didto sa siyudad sa Cotabato aron hisgutan ang pagdeklara og ceasefire sa mga apektadong dapit sa munisipyo sa Kabacan.

Away sa yuta o teritoryo ang ugat sa panag-away tali sa duha ka mga kumander sa diha nga plano nga tanuman og rubber tree sa grupo ni Dema-Ambil sa MNLF ang yuta sa mga lumad sa maong barangay. (EF)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph