7 gipamusil sa lalawigan, 1 patay

PITO ka mga tawo ang gipamusil sa manag­lahing dapit sa lalawi­gan sa Sugbo niadtong Sabado, usa ang patay.

TOLEDO

Usa ka drayber ang gipusil-patay sa laing dra­yber ug ang truck boy angol sa pagpamusil, alas 6:45 sa gabii niadtong Sabado, sa national highway sa Sitio Kalubihan Barangay Ilihan, dakba­yan sa Toledo.

Si Joel Bonghanoy, 32, lumad nga taga Val­lehermoso, Negros Orien­tal apan temporaryong nagpuyo sa Magdugo, To­ledo ug drayber sa delivery truck og softdrinks, nakaangkon og samad sa walang dughan.

Gidala siya sa tambalanan sa Toledo apan gideklarar sa mga doktor nga dead-on-arrival (DOA).

Ang naangol mao si Dionesio Traya, 28, ulitawo ug truck boy na­­kaangkog samad sa walang abaga ug nadala sa ospital sa dakbayan sa Sugbo.

Si Chief Insp. Michael Anthony Bastes, hepe sa Toledo Police nga nahi­nabi sa dySS Super Radyo ug Sun.Star Superbalita, nagkanayon nga ang biktimang si Bonghanoy nagmaniho sa Isuzu Elf truck YKR-987 nga nagkarga og softdrinks.

Gikan sila sa Poblacion, Toledo padulong mopauli sa Barangay Magdugo dihang ni-overtake ang Isuzu Forward YAB-773 diin nag-inusara lang ang nagmaneho niini.

Tungod sa pag-overtake niini, nasaghiran ang walang side mirror sa sakyanan hinungdan nga ilang gigukod human wala mohunong.

Dihang naka-overtake na sila, gibabag gilayon niini ang ilang sakyanan, nikanog sila si Bonghanoy ug Traya uban sa laing duha ka kauban.

Giduol nila ang nag-inusarang drayber nga gikalalis apan kalit lang kining nibunot sa wala matinong kalibre sa armas ug namusil.

Nipadagan dayon ang mamumuno sa iyang sakyanan paingon sa dak­bayan sa Naga.

Bisan sa gihimong paggukod nila ni Bastes, ug pagpangayog blocking force sa kapulisan sa Naga ug Talisay, nakaipsot gihapon kini.

“Bangi lang gyud ni sila sa trapiko gamay raman unta kaayo wala man gani mabuak ang side mirror pero mga init lagi silag ulo niresulta sa patay,” dugang ni Bastes.

Sumala ni Bastes, karong adlawa ilang su­taon sa Land Transportation Office (LTO-7) ang tinud-anay nga pangalan sa tag-iya sa sakyanan aron ilang masubay kinsay nagdala niini.

Ang naluwas nga si Traya nipadayag nga ang plaka YAB-733.

MANDAUE

Usa ka inahan ang napusilan sa iyaan sa dalan P. Del Rosario, Barangay Guizo, dakbayan sa Mandaue sa niaging adlaw.

Saksi sa hitabo ang duha ka mga bata sa biktima.

Ang biktima mao si Jocelyn Mativo nakaangkon og samad pinusilan sa iyang ulo ug gidala sa Mandaue City Hospital.

Si PO3 Marino Lofranco, imbestigador sa Investigation and Detection Management Branch (IDMB) sa Mandaue City Police Office (MCPO), nibutyag nga pasado alas 6:00 sa gabii ang biktima naninda og pagkaon sa P. Del Rosario.

Nakabati sila og buto sa armas ug mao na lay nakita sa mga bata nga natumba ang ilang ina­han.

Ang bata nitumbok sa ilang iyaan nga si Jenny Mativo nga nagpusil sa ilang inahan.

Matod ni PO3 Lofranco, ang 62-anyos nga inahan sa suspek, niasoy iyang nakit-an ang iyang anak nga nagduwa sa service firearm sa iyang anak nga lalake kinsay nagsilbing

security guard sa usa ka bodega sa lugar nahitaboan.

Sigun sa taho, ang armas gibilin sa iyang anak sa usa ka payag nga nagsilbi nilang guard house.

Ang inahan nibutyag ang iyang anak adunay deperensiya sa pangisip apan, ang kapulisan nagduda sa pamahayag niini hinungdan nga ilang gidakop ang suspek ug gitanggong sa Subangdako Police Station.

MINGLANIILA

Amahan ug iyang anak babaye nangaangol dihang aksidenting nakab­litan sa iyang amigo ang armas.

Si Jerry Rubas, 41, minyo, taga Barangay Tulay lungsod sa Minglanilla ug trailer operator sa planta sa softdrinks, samdan sa walang kamot human sa insidenti sa alas 7:30 sa gabii sa ilang panimalay sa Sitio Bacay, Barangay Tulay.

Ang iyang anak nga si Zenith, 13, samdan sa walang paa human nilapos ang bala samtang nagtuon sa sulod.

Nisibat ang suspek nga si­lingan nga si Edzel Franza, hingkod ang panuigon.

Si PO2 Nikko Carlo Plarisan, desk officer sa Minglanilla Police, nagkanayon nga si Franza ug iyang asawa nibisita sa panimalay sa biktima nga ilang higala.

Sa pag-abot nila sa pa­nimalay, nakalalis kini sa iyang asawa human nasuko kon nganong nagdala siya og kalibre .45 nga giluklok sa iyang hawak.

Tungod niini, nagka-init ang panaglalis ni Franza ug sa iyang asawa. Sa pagkuha niini sa iyang armas diha sa hawak, kalit kining nibuto.

TUBURAN

Usa ka mag-uuma ang kritikal human gi­banhigan sa wala mailhing tawo sa Barangay Cabcaban, lungsod sa Tuburan, alas 8:00 sa gabii.

Si Alberto Patindol, 32, mag-uuma ug dunay kapuyo nakaangkon og mga samad pinusilan sa iyang lawas human giatangan sa tawo nga nagtaptap sa iyang nawong.

Si PO3 William Guanzon, desk officer sa Tuburan Police, nagkana­yon nga ang biktimang si Patindol naglakaw kini sa dalan padulong mopauli sa ilang panimalay kuyog sa iyang kapuyo nga si Amalia Mahinay.

Sa pag-abot sa ngit­ngit nga lugar, nagpahipi ang usa ka tawo ug gipusil ang biktima sulod sa makatulo kahigayon ug dayong sibat.

Ang biktima gidali sa pagdala sa tambalanan sa dakbayan sa Sugbo.

Matod ni PO3 Guanzon, posible nga bangi sa yuta ang motibo sa krimen.

DANAO

Manghod nga nagmaoy sa kahubog gipusil sa nagmaoy usab niyang maguwang atol sa piyesta sa Barangay Guinsay, dakbayan sa Danao.

Si Wennie Nuñez, 26, ulitawo, walay trabaho ug taga Barangay Guinakot, Danao, kritikal human samdan sa walang tiyan human gipusil sa iyang maguwang nga si Lito, kinsa daling nisibat human sa krimen.

Si PO3 Arnorld Labine, desk officer sa Danao Police, niingon nga hubog ang duha ug nagkalalis nga niresulta sa pagpamusil.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph