USA ka tinun-an sa Grade II ang nagpatabang sa iyang silingan human gilugos sa iyang uyoan sa Poblacion, lungsod sa Tagoloan, Misamis Oriental.
Ang biktima mao si Lara (dili tinuod nga pangalan), 8, ug kasamtangan nga nagtungha sa Tagoloan Elementary School kinsa wala nay mga ginikanan.
Nitug-an ang biktima sa iyang silingan kinsa maoy nagpahibalo sa maestro niini.
Ang magtutudlo nisaysay sa usa ka interbyu sa sibyaan sa radyo nga nakigsulti kaniya ang bata dihang iyang gipangutana kabahin sa nadungog niini.
Ug positibong gikumpirma ni Lara nga sugod pa siya sa Grade I gisugdan paglugos sa iyang uncle nga giilang si Antonio Sabio, 60.
Gisaysay sa biktima sa maestra niini nga adlaw-adlaw himuon sa iyang uncle ang pagpanglugos ug ang schedule matag alas 4:00 sa hapon dihang mouli na gikan sa tunghaan ang bata.
Bisan unsang matang sa sex giingong gibuhat sa suspetsado ngadto sa biktima.
Dili lamang mahitabo ang pagpanglugos sa adlawng Domingo tungod kay ang asawa sa suspetsado anaa raman sa puloy-anan ug dili molakaw. Nasayran nga ang asawa sa suspetsado adunay negosyo ug dili kanunay makita sa puloy-anan tungod kay gabii na nga mo-uli.
Wala na naagwanta sa biktima ang kasinatian tungod sa kakapoy nga adlaw-adlaw kining gibuhat kaniya hinungdan nga nagpatabang sa silingan.
Nasayran nga nagpuyo si Lara sa panimalay sa iyang uncle human ang amahan niini namatay sa aksidente samtang anaa pa siya gimabdos sa iyang inahan.
Ang inahan usab sa biktima kinsa igsuon sa asawa sa suspetsado ang namatay bag-o lamang niadtong nilabayng tuig hinungdan nga gisagop kini sa magtiayon.
Si Police Officer 2 Armand Tagulimot sa Tagoloan Police Station nga nahinabi sa Sun.Star Superbalita niingon nga sa kasamtangan anaa na sa kostudya sa Department of Social Welfare and Development (DSWD) ang bata alang sa therapeutic counseling ingon man maka-eskwela og usab human i-transfer na kini sa buhatan sa laing tunghaan.
Ang suspetsado ning panahona ang misibat ug padayon pa nga gipangita sa Tagoloan Police Station. (Stephanie V. Berganio)