9 anyos nakit-ang patay

USA ka menor de edad nabangalang wala nay kinabuhi sa usa ka bakanteng luna didto sa Chapter 1, Barangay Aplaya, Davao del Sur.

Ang biktima nakit-an na lamang sa usa ka Jeezerey Alfanta, sa sagbutang bahin sa maong lugar banda alas 10 sa gabii niadtong Sabado.

Sumala sa taho gikan sa Digos City Police Office (DCPO) nga ang biktima naila nga si Ian Bague, 9, nagpuyo sa silingang Chapter 6 sa maong lugar.

Sigon sa imbestigasyon sa kapulisan, banda alas 3 pa niadtong Biyernes gipangita sa apohan ang biktima human nga wa na mahiuli sa ilang balay.

Si DCPO Police Chief Superintendent Huberto Abadia nagsulti nga wala pa sila masayud sa motibo sa kamatayon sa bata sanglit way makitang mga timailhan sa kalawasan nga gipatay siya.

"Walay samad dinunggaban o tinigbasan, wala sab pinusilan," butyag ni Abadia.

Gipailawom na sa otopsiya ang patay'ng lawas sa biktima aron masuta ang hinungdan sa iyang kamatayon.

Sa pikas bahin, namatay sab pag-abot sa bay tambalanan ang 65 anyos nga lalaki human mabanggaan og traysikel samtang nagbisikleta didto sa Barangay Balutakay, Hagonoy, Davao del Sur, Dominggo.

Ang drayber sa traysikel wala madakpi human nga daling misibat padung sa dakbayan sa Digos.

Giila ni Police Officer 3 Jose Marie Aznar ang biktima nga si Rodrigo Tandoy, lumolupyo sa Purok 4 sa nahisgutang lugar.

Gitin-aw ni Aznar nga ang maong hitabo gitaho kanila sa ig-agaw ni Tandoy nga si Romeo Tandoy Jr. human nga gibiyaan lang ang biktima sa drayber sa traysikel nga nakabangga daplin sa dalan banda ala 4:30 sa sayong kabuntagon.

Naligo sa daghang dugo ang biktima tungod sa naangkon nga pangos ug bun-og ug gihatud sa Davao del Sur Provincial Hospital (DDSPH), apan gideklara siyang dead on arrival.

Naningkamot na karon ang kapulisan nga mailhan ang suspek nga drayber aron nga pasakaan og kaso didto sa hukmanan. (Dondon Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph