Abogadong Joavan wa makatunga

PAKYAS pagtunga ang abogado ni Joavan Fernandez atol sa arraignment sa mga kasong iyang gi-atubang sud sa sala ni Cebu City RTC Branch 10 Judge Soliver Peras gahapon sa buntag.

Mao kini hinungdan nga wala madayon ang arraignment sa akusado sa mga kasong illegal nga pag­hupot og armas ug granada ingun man kalapasan sa Comelec gunban.

Kini subay sa iyang pagkasikop didto sa ilang panimalay sa dakbayan sa Talisay, duha na ka semana ang milabay.

Atol sa court proceeding gahapon sa buntag, gipapili ni Judge Peras si Joavan ug abogado sud sa korte nga maoy mo-assiter kaniya alang sa arraignment apan gibalibaran kini ni Joavan ug mihangyo nga isibog ang iyang arraignment  hangtud nga anaa na ang iyang abogado nga si Paulino Labrado.

Ang prosekusyon pinaagi ni Fiscal Raul Cristoria, wa hinuon mosupak sa pagsibog sa arraignment ngadto sa Mayo 31.

Bisan og mitugot ang korte nga isibog ang iyang arraignment, gipasidan-an kini sa huwes nga kinahanglang madala na niya ang iyang abogado sa sunod nga setting aron di na malangay pa ang pagsibog sa kaso.

Tag-tulo ka mga saksi ang planong ipresentar sa prosekusyon sa matag usa sa tulo ka mga kasong gi-atubang ni Joavan. Lakip sa ipresentar mao ang mga pulis nga misikop kaniya sa Talisay, representante sa FESSAGS ingun man sa Comelec.

Ang mga kasong illegal possession of firearms, explosives ug kalapasan sa gunban maoy nakaingon sa pagka-balhog ni Joavan sa prisuhan sa Talisay, diin siya nipuga.

Nadakpan ra kinig balik sayo ning semanaha sa lungsod sa Moalboal. (Astra Zina D. Logarta)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph