AC Troopers nakabawos sa Lanlyns Lumpia

Mga duwa karon:

(For third place) 8:00 pm. – Lanlyns vs. Herea

(Championship)9:30 pm.– AC Troopers vs. Akira

SAKTONG panimalos maoy naangkon sa AC Troopers sa dihang ilang gipalagpot ang defending champion Lanlyns Lumpia Wrappers sa cross-over semifinals, 81-66, niadtong Martes sa gabii sa Emil’s Fresh Chicken Cup Invitational tournament sa Lipata Sports Complex, barangay Linao, lungsod sa Minglanilla.

Sukwahi sa gipaabot sa nagdasok nga mga dumadapig, ang Troopers ni Dondon Corosco yano ra kaayong nakaposte og double-figure nga labaw bisan pa gani sa tungatungang bahin sa second quarter ug wala na gyud kini mahudlat pa hangtod sa katapusang bahin sa panag-engkuwentro nga gihulagwayng maoy championship rematch sa miaging tuig.

Si Ferdinand Lusdoc ug si Eman Calo nagkumboya og 38 puntos aron pangulohan ang Troopers kinsa wala pa gyud makaangkon og kapildihan sukad sa pagsugod ning torneyo.

Nagsugod og kamangtas ang opensa sa Troppers sa dihang mipakita og ka lugak ang depensa sa Lanlyns sa ilawom nga bahin.

Sa sayo pa, ang Akira Foods Services nakaipsot sa mga kamot sxa Herea Salon ang Spa, 70-61.

Ang Herea nga mikuha sa serbisyo nila ni Abe Santos, Ronald Glorioso ug import Steve Cedrick Akomo nakahatag pa og saktong kombati sa sayong mga bahin.

Apan sa krusyal nga mga minutos, sila si kanhi PBA players Jojo Tangkay ug Stephen Padilla inabagan nila Mark Abadia ug Franklin Naylon maoy mituldok og kasiguroan alang sa maong kadaugan.

Karong gabii, kulbahinam ug tugob sa aksyon ang gipaabot sa dihang ilogan na ang kampyonato sa Akira ug sa AC Troopers – ang duha ka koponan nga gilangkuban sa mga kanhi PBA ug mga nag-unang commercial players sa Sugbo.

Samtang ang Lanlyns ug Herea mao usab ang mag-abot alang sa ikatulong puwesto. Ang duwa sugdan sa alas otso sa gabii nga tugkma usab sa pagkahuman sa misa alang sa unang nobenaryo alang sa kapistahan sa patron nga si Sr. San Roque.

Ang mga puntos:

Akira (70) – Tangkay 22, Rez 10, Padilla 9, Berame 6, Labares 6, Abadia 5, Torion 4, Naylon 4, Suliman 4. Herea (61) – Santos 11, Glorioso 11, Villaver 10, Akomo 9, Sereno 8, Aldave 6, Bologon 4, Getubig 2.

AC Troopers (81) – Lusdoc 24, Calo 14, Aying 10, Luga 9, Larong 8, Ababon 7, Juntilla 6, dela Rama 2, Binongo 1.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph