RESPONSABLENG pagsagop sa bata ang gikampanya karon sa Department of Social Welfare and Development (DSWD) dinhi sa rehiyon, subay sa Adoption Consciousness Week nga magsugod Pebrero 4-10 ning tuig.
Subay sa temang 'Isulong legal na pag-aampon,' nagkadaiyang programa, mga aktibidad ang giandam alang sa pipila ka adlaw nga kalihukan.
Giyagyag ni Sheryl Ann Dumalogdog, DSWD Social Welfare Office 2 nga unang sikad sa ilang kalihukan mao ang motorkada karong Pebrero 4 padung Rizal Park, nga sundan sab sa usa ka programa.
Luyo niini, dunay imuntar sab nga Adoption Desk sa nagkadaiyang ahensiya sa gobyerno ug establisemento, sama sa SM Center, National Statistics Office (NSO), Social Security System (SSS) ug Government Service Insurance System (GSIS).
"We promote the legal way of adoption sa atong children. Aside sa children nato sa DSWD, ‘yung other children natin sa ibang centers are also open for adoption," ni Dumalogdog sa Kapehan sa SM City Davao.
Nasayran nga sa nakalabay nga tuig, pito ka langyaw nga aplikante ang mi-apply aron makasagop og batang Pinoy, diin sigun ni Dumalogdog 50% ang approval number niini.
Usa lamang ang magtiayong Mark ug Louise Jones nga tag Britanya nga misagop og bata gikan dinhi sa rehiyon.
Alang sa magtiayon nga nag-istar na dinhi og kapin unom ka tuig, naaghat sila sa pagsagop tungod buot nilang makabaton og mas dakong pamilya.
"It took us five months to collect all the papers needed for the adoption. We just want to have a larger family," ni Mark Paul.
Ang DSWD may duha ka klase sa pagsagop og bata, kini ang domestic adoption ug ang inter-country application diin nag-unang nationality nga naga-apply sa adoption mao ang Estados Unidos.
Gipaneguro sab ni Dumalogdog nga una ihatag ang bata ngadto sa langyaw'ng pamilya nga buot mosagop kaniya, miagi una kini sa taas nga proseso, gipangayoan sila sa dokumento.
"Siyempre ginalikayan sab nato nga mabiktima ang atong mga bata sa child trafficking mao nga we asked them the papers na necessary gyud. Gina-tsek nato sila physically, psychological evaluation and other test." (Rhona O. Goc-ong)