Aguelo milampos pagdepensa sa titulo

MALAMPUSON nga gidepensaan ni Adonis “TI Yamagata” Aguelo sa Maasin City ang Philippine Boxing Federation (PBF) featherweight title pinaagi sa unanimous decision nga kadaogan batok ni Renan Branzuela sa “Binakbakay sa Barangay” sa Basak gym, dakbayan sa Lapu-lapu niadtong Dominggo sa gabii.

Ang kaagresibo ni Aguelo nga mi-pressure ni Branzuela gikan sa pagsugod sa round hangtod na sa katapusang hugna maoy nagkapakonbinsi sa tulo ka judges pabor kaniya 96-94, 97-93 ug 97-93.

Sa sayong bahin sa away, si Branzuela mao gyud untay perming moataki apan sa pagsugod sa ikatulo daw sa nabali ang dagan sa dihang nakigbell-to-bell si Aguelo.

Sa round eight ug nine, gidabodabohan og maayo ni Aguelo ang tiyan ni Branzuela hinungdan nga pila ka higayon nakasandig sa pisi ang nauwahi.

Sa supporting main bout, midaog si Romnick Magos baotk ni Roemart “TI Yamagata” Sentillas sa laing 10-round nga panagsangka.

Gikuhaan og puntos si Sentillas sa unang round tungod sa accidental headbutt nga maoy nakagisi sa tuong kilay ni Magos.

Taliwala sa pagsige og agos sa dugo, si Magos daw sama sa usa ka tigre nga samdan nga miataki ni Santillas aron kuliton ang unanimous decision ka kadaugan. Ang scores, 98-91, 97-92 ug 97-92.

Gi-TKO ni Gerpaul “TI Yamagata” Valero si Erwin Pulvera sa third round. Kaduha gyud mahagsa sa kanbas si Pulvera hinungdan napugos gyud si Tony Pesons sa pag-undang undang sa away.

Di maayo ang unang away sa haponanon nga si TI Yamagata Masashi human kini mapukan sa Sugboanong si Junior Salvador.

Saktong sinukliay sa kumo ang nasaksihan sa nagdasok nga tumatan-aw nga naglakip kang kanhi world champion Rodel Mayol sa maong away una pa nakuha ni Salvador ang majority decision human sa unom ka hugna.

Midaog usab si Renoel Pael batok ni Anthony Galigao samtang gi-knockout ni Ardie Boyose si Reymund Fermin sa third round.

Ang “Bakbakay sa Barangay” ubos sa promosyon ni Akira Sato sa TI Yamagata Promotions ug inabagan ni Basak Brgy. Captain Isabelito “Belong” Darnayla ug sa barangay council nga gisuportahan ni 6th District Rep. Luigi Quisumbing.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph