GIKWESTIYON sa opisyal sa Alliance Against Impunity-Union of People's Lawyers in Mindanao (AIM-UPLM) ang huyang nga sistema sa hustisya sa Pilipinas.
Ang pagkwestiyon gihimo ni AIM-UPLM convernor Attorney Carlos Zarate dihang nahinabi sa Sun.Star Davao niadtong Biyernes.
Suma ni Zarate nga hinay kaayo ang dagan sa kaso sa Maguindanao massacre nga gihuptan sa special court busa kinahanglan nga doblehon sa gobyerno ang paningkamot aron daling maresolba ang kaso nga gikalambigitan sa pamilyang Ampatuan.
Giawhag ni Zarate ang gobyerno nga resolbahon sa labing daling panahon ang maong kaso nga gikamatay sa 58 ka mga tawo, kadaghanan kanila mga sakop sa media.
Sa pagkakaron, suma ni Zarate, nga daghang mosyon ang gihimo sa mga abogado sa mga Ampatuan aron mosamot kalangan ang proseso sa kaso.
Sa laing bahin, giawhag sab ni Zarate ang gobyerno nga di motuo sa pagpanglingla ni kanhi Autonomous Region in Muslim Mindanao governor Zaldy Ampatuan.
Gibutyag ni Zarate nga kung mahimong state witness si Zaldy, di gayud mahatagan og hustisya ang mga biktima sa masaker.
Suma ni Zarate nga kinahanglang nga magbantay ang gobyerno sa pamaagi ni Zaldy ug kanhi Maguindanao election officer Lintang Bedol.
Gipanghinaut ni Zarate nga di unta magpadala sa hanyag ni Zaldy ug Bedol si Pangulong Benigno Aquino III.
Gidugang ni Zarate nga gusto ni Zaldy Ampatuan nga mahimong state witness aron maluwas ang iyang kaugalingon sa kaso sa Maguindanao massacre.
Kung makalingkawas si Zaldy sa kaso, dako ang posibilidad nga mahitabo ang grabeng kagubot sa Maguindanao tali sa pamilyang Ampatuan ug Mangungudatu. (Alger Dura/Arianne Caryl Casas)